Page 30 - MIN.VOS ALEX SCHWENGLE

Seccion Malesa Contagioso no a wordo notifica pa docter
riba posible caso di sarampi

Publication: Tuesday, 27 January 2015. Categoria: General

Den contacto cu funcionario di DESPA:

Mayornan tambe por notifica DESPA!

ORANJESTAD (AAN) – Matutino DIARIO a tuma contacto, dialuna mainta, cu Departamento
di Salubridad Publico su seccion di Malesa Contagioso, pa busca informacion relaciona cu
posible brote di sarampi na Aruba.

Nan tambe a tuma nota di e articulo publica den nos matutino (cual fuente di informacion ta
completamente confiable y no ta laga espacio na speculacion), y mesora nan a yama e
personanan concerni pa haci un investigacion, mirando cu nan no a haya notificacion di ningun
docter di cas cu por a haya un of mas caso di mucha cu sarampi.

Manera DIARIO mes a comenta, no ta usual cu na Aruba por tin brote di sarampi, mirando cu
den termino practicamente general, nos muchanan ta haya e angua di e vacuna combina, cu ta
inclui sarampi.

Pero imposible e no ta tampoco. E situacion ta cu si e docternan di cas mes no ta notifica
Salubridad Publico, nan no por haci un investigacion, via Departamento di Malesa Hubenil, pa
saca afo ta di con e mucha por a haya e malesa, si ta cu e no a wordo vacuna, si kizas por a
wordo contagia afo, etc.

Sarampi ta un malesa cu POR tin su complicacionnan cune. Pesey ta hopi importante pa
Salubridad Publico su departamento di Malesa Contagioso wordo notifica, y incluso e mayor
mes por tuma e iniciativa di yama y pone nan na haltura cu su yiu a wordo diagnostica cu
sarampi. Si tin un caso so mes, ta importante pa sea e docter of mayor tuma contacto cu
Salubridad Publico pa nan tuma accion pa evita cu e malesa infantil aki por plama y contagia
mas mucha, pasobra e ta un malesa cu masha lihe por pasa di un mucha pa otro. Den otro
articulo nos lo elabora riba sarampi.

http://www.diario.aw/2015/01/seccion-malesa-contagioso-no-a-wordo-notifica-pa-docter-riba-posible-
caso-di-sarampi/