Page 17 - AWEMAINTA

Diaranson, 30 Mei 2018 AWEMainta 17

Fase 1 di e programa piloto “Best Dad

Ever!” a termina exitosamente

‘LO TA mi deseo p’e programa aki por continua
p’asina mas tata por tin mas conocemento y por
envolucra mas cu nan yiu’.
Un tata cu a participa n’e programa Best Dad
Ever! di Fundacion Telefon pa Hubentud Aruba
y Tienda di Educacion ta duna su opinion
tocante e programa.
Dia 3 di mei ultimo e programa piloto Best Dad
Ever! a yega final di fase un. Fase un ta ensera
cu e prome tatanan a participa n’e programa
cu ta stimula participacion di tata cu cuido y
educacion di nan yiunan.

Durante 10 anochi, e tatanan a ricibi
informacion y conseho y por a papia tocante
nan sintimentonan. E temanan cu a ser presenta
ta: Impacto di tata, Embaraso, Nacemento,
Planea Famia, Duna cuido, Genero, Violencia,
Necesidad y Derecho di Mucha y Particion di
tarea. Na final di programa e tatanan a ricibi
nan certificado di participacion n’e programa
for di man di Pim van Loon representante
di ‘Vertegenwoordiging van Nederland na
Oranjestad’ cu a sostene e prome fase di Best
Dad Ever! financieramente.

Actualmente e programa ta ser evalua pa
despues drenta den e proximo fase. E proximo
fase ta ensera cu e programa lo ser transferi na
Centronan di Bario na Aruba.

E Centronan di Bario
na Aruba lo haya un
training p’asina nan
mes por bira facilitador
di e programa den nan
Centro di Bario y nan
Bario.

Fundacion Telefon pa
Hubentud Aruba y
Tienda di Educacion
kier a gradici e tatanan
cu a participa, VNO,
Dorilis Werleman,
Micheal Quant y
Famia Planea pa nan
sosten.