Page 6 - IMSAN 16 JULI 2015
P. 6
Parti financiero a stroba hacimento di operacionnan di
curazon na Aruba
Publication: Thursday, 16 July 2015. Categoria: General
ORANJESTAD (AAN): Mas of menos 200 pashent ta haya ataca di curazon pa aña y mester di
caterisacion y dokter (habri slagader y instala un stent). E intervencionnan aki ta tuma luga den
exterior. Operacionnan di bypass y di klep di curazon tambe ta tuma luga na Colombia. Cu e
proyecto piloto, a haci e intervencionnan y operacionnan aki na Aruba cu resultado exitoso, pero
e parti cu a haci dolor ta e parti financiero, Minister Schwengle a splica.
Loke a tuma luga cu e “pilot” tabata cu a establece un fundacion cu na su turno a busca
specialistanan di Hulanda y a bin cu literalmente cu full e team y tur aparato necesario cu no tin
nan Aruba for di Hulanda pa haci e operacion y intervencionnan. Esey a haci e gastonan mas
halto cu normal, segun Schwengle.
“A haci un evaluacion tambe di esey y nos sa cu muy probablemente nos lo por haci tur e cosnan
aki na Aruba den un bon calidad y probablemente den e mesun begroting cu nos ta mandando
Colombia. Dus enbez di uza placa na Colombia nos lo por uza e placa aki na Aruba mes. Claro
cu den comienso lo bo tin mas gasto, pasobra den comienso bo mester haci cierto inversionnan.
Por ehempel si tin aparato cu bo no tin, bo mester cumpra nan,” Minister Shwengle a splica.
E mandatario a añadi cu e aparatonan no ta cos cu bo ta cumpra tur aña, pero nan ta wanta 5 pa
10 aña sigur una bez cu dicidi tocante con lo sigui pa trece e operacionnan aki Aruba.
El a bisa cu den comienso e costo lo ta un poco mas halto, pero cu e lo nivela di su mes y hasta
tin chens cu e lo sali un poco mas barata compara cu manda pashent afo.
Schwengle a comenta cu e formula cu nan ta pensando riba dje ta pa cumpra e aparatonan,
provee e sala di operacion y train e personal necesario cu por traha cu un team chikito for di
exterior cu ta consisti di specialistanan manera un anestesiologo y nurse specialisa, y un ciruhano
cardiovascular.
