Page 8 - IMSAN 16 JULI 2015

Proyecto di operacionnan di curazon pa Aruba ta sigui

Publication: Thursday, 16 July 2015. Categoria: General
Minister Schwengle:

ORANJESTAD (AAN): Minister dr. Alex Schwengle a confirma den un entrevista e siman aki
cu e proyecto pa trece operacionnan di curazon Aruba ta sigui, pero no lo sigui for di e punto aki
padilanti cu e fundacion cu a percura pa e proyecto piloto.
E proyecto piloto a provee basta dato importante y a prueba cu e tipo di operacionnan aki ta
posibel den Dr. Horacio Oduber Hospitaal pa medio di un analisis profundo y evaluacion haci pa
un profesor Hulandes cu a conclui cu e resultadonan di calidad y siguridad tabata “above
average”, Minister Schwengle a bisa.
Aruba no ta sigui mas cu e fundacion y ta buscando un partner academico; actualmente ta
papiando cu un hospital grandi academico na Amsterdam cu tin un thorax-centrum, pero nada no
ta concreto ainda, e mandatario a declara. Aruba kier bay sigui awo cu un partner fiho, el a
agrega.
Mas of menos 20 miyon dollar ta bay Colombia pa cuido tur aña y un gran parti di esaki ta bay
pa cubri condicionnan y intervencionnan cardiovascular y cuido di pashentnan cu cancer. Algun
pashent tambe ta wordo manda Corsou pa radioterapia y operacionnan hopi specifico ta wordo
haci nan Hulanda.
Un gasto di cuido den exterior cu Aruba a logra corta y ta inverti na nos isla mes awendia ta e
tratamento di injeccion den wowo cu awo ta tuma luga na Aruba mes, e mandatario a splica.
Un gran parti di e cuido di pashentnan di oncologia ta wordo haci na Aruba mes, manera
operacionnan – menos esunnan mas specifico of complica – y quimoterapia. E parti di
radioterapia, cu ta trahando ariba pa trece Aruba na IMSAN, awendia ta tuma luga na Colombia
y Corsou.