Page 10 - min.ttc dec 29,2015

Periodo di Carnaval 2016 ta cortico pero entusiasmo no ta falta

Publication: Tuesday, 29 December 2015. Categoria: General

Otmar Oduber:

ORANJESTAD (AAN): E mandatario encarga cu e cartera di cultura, kende ta un carnavalista
di curazon, den un entrevista dialuna a splica cu dos tradicion importante, manera Dande y
Carnaval, ta cay practicamente hunto, pero e entusiasmo pa tur dos ta keda grandi.
Determina pa sigui promove Dande den gran forma, Minister Otmar Oduber a splica cu e festival
di Dande den futuro ta bay keda den “aire liber”, den un luga publico, unda cu no ta cobra
entrada. E decision pa organis’e riba Linear Park e aña aki a resulta den un exito rotundo; e
mandatario a keda hopi satisfecho y contento cu e festival.

Asina cu aña bolter comunidad lo bay wak movecion riba Plaza Betico Croes, unda cu e
trabaonan di mantencion na un total di 1.3 miyon florin ta bay cuminsa. E trabao ta consisti di
dos fase y e minister a bisa cu tur cos mester keda cla pa dia 13 di maart pa asina Aruba por
celebra Dia 18 di Maart den grandi riba Plaza Betico Croes.
Pa loke ta trata Carnaval, Minister Oduber a bisa cu e lo ta siguiendo tur desaroyo for di un
distancia y no lo ta mes hopi envolvi cu e tabata aña pasa, cual tabata SMAC su prome aña como
organisador di e eventonan.
E entusiasmo pa e evento cultural aki ta grandi, aunke e temporada ta cortico, segun Oduber. El a
agrega cu e ta compronde cu tin mas di 12 grupo inscribi caba pa fakkel of “e mecha” cu ta tuma
luga riba dia 2 di januari.
Esaki ta un oportunidad unico pa e bishitantenan cu nunca ta experencia un actividad di
Carnaval, pero tambe ta beneficia e studiantenan cu ta na Aruba cu vakantie, kende usualmente
ta biahando bek e prome fin di siman di aña, pero awo por disfruta di fakkel e aña aki.
Cu e Parada Grandi tumando luga riba dia 7 di februari, e mandatario ta desea SMAC y
MUSICA hopi forsa y sosten pa cu e temporada cortico aki. E no ta mira ningun problema
relaciona na e organisacion y actividadnan como cu el a papia cu diferente stakeholder y a haya
tende cu SMAC a reuni caba cu nan y tin diferente bon afspraak haci.