Page 37 - MIN JUS FLIP 5th JUNE 2017

Minister Bermudez ta felicita Departamento di Aduana cu
nan website nobo

Sunday, 04 June 2017 20:46
Comparti

Diabierna mainta Departamento di Aduana a lansa nan website nobo cu e meta principal di comunica,
informa y educa henter comunidad
, alabes e website ta conta cu un diseño moderno y facil pa usuarionan nabega online. Segun Minister di
Finanzas, Angel Bermudez, desde prome bista caba, e usuarionan ta haya gran parti di informacion pa
varios facilidad y servicionan di aduana.
“E website ta conta cu tres categoria principal cu informacion pa pasaheronan cu ta biaha y cumpra
producto of mercancia den estranheria, personanan cu tabata biba pafo di Aruba y ta muda bin biba na
Aruba y tambe e comerciantenan cu ta importa productonan na Aruba”, asina e mandatario a splica.
Minister Bermudez a sigui splica cu desde un aña pasa caba a duna instruccion pa renoba e website di
Douane y den e transcurso di e ultimo 6 lunanan a traha duro riba e proyecto aki y a logra finalisa esaki
exitosamente.
“Mi a wak cu e ta na Hulandes te ainda, esey ta pa motibo cu e leynan cu nos ta aplica ta skirbi na
Hulandes. Sin embargo e traduccion completo di tur informacion na Papiamento, como tambe Ingles,
dentro di poco ta disponibel pa asina mas tanto hende posibel por consulta y haya e informacion
necesario for di e website”, e mandatario a indica.
Renobacion di e website di Departamento di Aduana ta un otro ehempel di e esfuersonan pa sigui
modernisa y digitalisa e trabou di e duaneronan y na mes momento traha mas eficiente y duna un bon
servicio na comunidad.
Durante e conferencia, e mandatario a indica cu e ley di aduana, esta e L.U.I.D, un ley di 1908 y cu ta e
base legal cu e duaneronan ta traha cu n’e. tambe ta pasando den un proceso di modernisacion. “Nos a
redacta un ley totalmente nobo cu yama ALDA y esey ta na departamento legal actualmente pa e ultimo
revision pa despues nos mande Raad van Advies”, asina Minister Bermudeza informa.

E ley di ALDA ta un ley bastante amplio segun e mandatario, sin embargo asina cu e wordo formalisa den
Parlamento, e ta modernisa completamente funcionamento y manera di procede di henter e cuerpo
duanero. Pues e no ta solamente un ayudo pa e duaneronan, pero tambe pa e comerciante cu ta importa
producto di afo.
“Mi ta orguyoso di e ultimo avancenan aki y tambe di e website nobo. Un palabra di pabien na tur colega
di aduana cu a coopera y a forma parti di e proyecto aki cu awe a bira un realidad”, Minister Bermudez a
expresa.