Page 39 - MIN JUS FLIP 5th JUNE 2017

Minister Mike Eman tocante Proyecto Dreamers: Pabien na
Minister Sevinger y DIMAS pa bin cu un solucion husto pa e

grupo vulnerabel aki

Sunday, 04 June 2017 20:41
Comparti

Manera a keda publica, diaranson ultimo Prome Minister Mike Eman tabatin e honor di haci entrega di
documento di permiso ‘firma liber’ na e prome dos beneficiadonan di e programa ‘Dreamers’.
E proyecto a keda crea riba iniciativa di Gabinete Mike Eman y den cooperacion di varios instancia
publico bou coordinacion di DIMAS. Pa Premier Eman, tabata e final di un caminda largo unda cu a
lucha pa un grupo vulnerabel den nos comunidad, pero cu awor tin e oportunidad igual na otro
ciudadanonan di nos pais.

“Mi ta gradici tur cu a traha sumamente duro pa haya un solucion na un reto cu nos tabata mira cu tabata
crea hopi incertidumbre, hopi dolor y hopi desapunto cerca hopi hoben cu tabata yega na e edad cu nan
kier sigui studia of kier cuminsa traha y diripiente ta descubri cu, pa loke ta trata nan documentacion,
tabata haci esaki imposibel,” Prome Minister a expresa splicando cu ta hopi e biahanan cu el a sinta cerca
e mayornan, docentenan tambe y hopi di esnan cu ta topa e casonan aki y tabata sinti e mesun
preocupacion cu ne.
Semper cu un acercamento humanitario, a purba yuda den casonan individual pero a ripara cu e miho
solucion tabata pa crea un maneho caminda por yuda tur esnan merece di e ayudo. Asina a crea un
criteria y un proceso na DIMAS. A stipula e punto mas importante cu ta cu e hoben mester tin 10 aña
bibando na Aruba di cual 5 el a bay un scol, ademas di otro rekisitonan.
Despues di e parti oficial y administra, pa Prome Minister Mike Eman tabata un placer di por duna un
cara na tur e esfuersonan haci y den e caso di proyecto ‘Dreamers’, e momento ey a yega e siman aki den
persona di e rumannan Cristian y Cristina Saitch. Entregando e documento den man di Cristina, Prome
Minister Eman a bisa: “Cristina mi kier a cuminsa na entrega bo permiso basa riba e condicionnan nobo
di Dreamers. Hopi pabien. Bo ta un Arubiano nobo y awo oficial.”
Nos Prome Mandatario tambe a indica cu ambos ta ricibi permisonan cu ta duna nan diferente derecho y
cu Gobierno di Aruba lo sigui cana cu henter e proceso pa mas persona por bin dilanti cu e informacion
cu nan tambe ta cay bou di e categoria aki. Premier Eman a felicita Minister Sevinger como titular di
Integracion pa haci e diferencia importante aki y naturalmente tambe na DIMAS cu tabata representa pa
Kathy Ruiz-Paskel y Mario Wever.

E director di DIMAS a felicita Cristina y Cristian cu awo tin nan status legal. Ruiz-Paskel a indica cu e
departamento tin actualmente 100 peticion di Dreamers den proceso di tramite, mientras cu otronan tin
cita pa haci screening. E ta invita tur esnan cu ta kere cu ta cay bou di e categoria di Dreamers pa bay riba
website caminda tin tur informacion y formulario ya cu ultimo dia cu DIMAS lo ricibi peticion ta 30 di
juni 2017. Na sede di DIMAS tambe tin dos bali disponibel tur dia pa brinda informacion.