Page 13 - MIN.VOS APRIL 21,2015

AWEMainta Diamars, 21 April 2015 3

Gobierno di Aruba a ricibi edificio
pa prome Facilidad Multifuncional

E PROME di cinco Facilidad Multifuncional ta cla y pronto lo habri su

portanan na publico pa ofrece un sinergia entre loke ta servicio administrativo,
recreativo, social y educativo, manera Minister President Eman a duna di
conoce. Esaki ta pa prome biaha na Aruba y tur e partidonan envolvi den
su realisacion ta hopi satisfecho y entusiasma di por ofrece bario di Noord
y pueblo di Aruba un regalo asina valioso y revolucionario den termino di
servicio y operacion. Ademas di su capacidad multifuncional, e edificio di
MFA na Noord tambe ta uno inovativo riba nos isla pa su sostenibilidad.

Despues di a haya un recorido completo di tur oficina y espacio n’e prome
y di dos piso di e edificio ubica banda di Warda di Polis na Noord, Prome
Minister Mike Eman a bay n’e dak pa personalmente mira con esaki a keda.
Pronto Elmar ta bay instala panelnan solar cu lo percura pa produccion di
energia cu e edificio mester pa funciona y ainda mas.
Den compania di arkitecto Orlando Hoevertsz, a wak e oficina y bali di
Hulpbestuurskantoor, AZV, WEB y Biblioteca Nacional, ademas di e lift cu
ta haci di MFA Noord un edificio publico cu ta habilita pa personanan cu
limitacion fisico. Rond di henter e interior, por tuma nota di diferente toke
cu ta identifica e edificio cu e pueblo di Noord, en particular e lama y su
piscadonan.

Presente tambe tabata Minister di Infrastructura Benny Sevinger, kende a
expresa cu Noord ta sali beneficia den henter e vision aki.
“E vision no a keda na vision, pero el a wordo ehecuta tambe. Noord por ta
orguyoso.” Tambe a indica pa proximo aña, MFA di Noord lo keda conecta
pa medio di e Watty Vos Boulevard.
Di su banda, John Hodgson como President di Stichting Onroerend Goed
Aruba, a gradici Aruba Investment Bank y tur otro cu a coopera cu SOGA
den e realisacion di e proyecto aki.
SOGA tambe ta mira e balor di e proyecto aki pa comunidad di nos pais.

Sr. Hodgson a expresa cu esaki: “Ta un tremendo comienso di un periodo
nobo den servicio.”Despues cu e panelnan solar keda instala y e parti paden
haya tur su mueble y ekiponan, ta realisa un apertura grandioso caminda
henter pueblo di Noord y Aruba ta invita di aworaki caba pa bin conoce e
capacidad di e prome Facilidad Multifuncional.
Entrega di yabi a bay for di contratista Bohama Aruba N.V. pa arkitecto
Hoevertsz kende na su luga a pasa e yabinan pa SOGA y esaki a haci entrega
oficial na Land Aruba den persona di Prome Minister Mike Eman.
Tambe ambos a firma e documentonan legal cu ta marca e traspaso oficial di
e edificio pa Gobierno di Aruba.