Page 45 - MIN SOC,JULY 01,2015

Na momento cu constata cu tin un infraccion(nan) di e ley di Admision, e instancianan concerni
por tuma pasonan necesario. E sancion por varia di deportacion di esun cu ta indocumenta te cu e
sancionamento cu multa administrativo di e dunador di trabao.

E multa administrativo pa un dunador di trabao particular sigun ley di Admision por ta un
maximo di Afl. 10.000,- y pa un entidad huridico (ora ta trata di compania registra) por ta un
maximo di Afl. 25.000,- pa cada infraccion, pues pa cada persona indocumenta of cada persona
cu ta viola condicionnan di nan permiso di estadia.

Ta aplicando un sistema segun un asina yama “sliding scale” ora di determina e multa
administrativo pa e dunador di trabao, y esaki ta depende di diferente componentenan, manera: e
seriedad di infraccion(nan), si ta trata di promer control of no y tambe e cantidad di infraccion
constata durante un control.

Prome cu determina si ta duna e dunador di trabao un multa administrativo pa e infraccion(nan)
di e ley di Admision , e dunador di trabao ta haya e oportunidad pa duna un declaracion (dentro
di 2 siman) respecto locual a constata na su empresa y locual ta menciona den un raport di
control respecto e infraccion(nan).

E dunador di trabao mester paga e multa administrativo, stipula pa e empleado encarga cu
reparticion di e multa administrativo, dentro di un termino di seis (6) siman na DIMP
(Departamento di Impuesto). Den caso cu e dunador di trabao opta pa no haci esaki den e
termino stipula, pa cualkier motibo, e ley di Admision ta prescribi cu lo por bay over na tuma
medidanan necesario pa percura pa cobra esaki na un manera forsoso (por medio di un
“dwangbevel”).

Control ta sigui:

E controlnan pa cumplimento di leynan di Labor y Admision lo sigui y ta pidi tur dunador di
trabao pa percura pa semper tin tur cos na ordo manera ley ta prescribi y asina evita paga multa.

Tipline di Guarda nos Costa: 583-9065.