Page 67 - KPA SEPT 14 2015

Minister Dowers a reuni cu Plataforma Profesional den prome reunion oficial

Publication: Monday, 14 September 2015. Categoria: General

ORANJESTAD(AAN)–: Despues cu e Comision Plataforma Nacional a keda forma, e
mandatario encarga cu Husticia, Arthur Dowers, e siman aki pa prome biaha a topa cu e
miembronan di e comision.

Aunke a topa cu e miembronan caba, esaki tabata e prome reunion oficial unda diferente gremio
a topa pa papia riba problema di hobennan na Aruba.

“Den husticia nos ta wordo confronta cu e consecuencianan di tur problema social y di famia, y
problema di educacion y formacion di hende nos ta wordo confronta cu nan na husticia. Pesey
nos a bini cu e iniciativa pa lanta bek e Plataforma Profesional cu tabata existi antes bou di
Plataforma social. Asina ey percura cu tur esnan cu por duna un contribucion na mehora e
condicion y preveni cu hobennan ta bay den direccion robes, ta bini hunto,” Minister Arthur
Dowers a duna di conoce.

Algun di e instancianan cu ta forma parti di e Plataforma aki ta Ministerio Publico, Cuerpo
Policial, Departamento di Asuntonan Social, Voogdijraad, Reclassering, FCCA, Bur Leerplicht,
etc. E ultimo departamento aki, e mandatario a splica, ta hunga un rol importante den e
Plataforma, ya cu cada mucha cu a bira un “drop out”, cu en realidad mester ta na scol, ta tende
for di nan cual ta e problemanan, kico nan a mira ta pasa ultimo tempo y asina ta palabra con pa
traha riba plan individual. Pues ta traha riba casonan cu ta forma problema pa comunidad, sea
social of di siguridad.

Den e reunion a trata diferente caso specifico y a haci palabracionnan pa “follow up”, mirando
cu hopi di nan ta complica. Despues a reuni den un grupo mas chikito, pa papia riba algun caso
specifico cu ta mas problematico.

A keda palabra cu e Plataforma ta topa cada dos siman, tin biaha den un grupo mas chikito (di
esnan directamente envolvi). Den e prome reunion a papia riba areanan di San Nicolas y pariba
di brug. “Nos tin hopi confiansa cu esaki lo duna un resultado positivo. Hopi di esnan presente
tabata contento cu e Plataforma a lanta bek. Principalmente pasobra hopi hende ta mira cu e
problemanan ta asina compleho cu nan so no por atende y awor ta bay trata nan den forma
integral,” e mandatario a duna di conoce.

http://www.diario.aw/2015/09/minister-dowers-a-reuni-cu-plataforma-profesional-den-prome-
reunion-oficial/