Page 68 - AVP

*Husticia y Parlamento mester bini cu investigacion di acusacion

*E no a bay autoridad cu supuesto hecho castigabel di ciudadano

ORANJESTAD(AAN)–Un caso sumamente serio a desaroya durante ultimo siman
despues cu Ministerio Publico a duna inicio na investigacion den asunto di tereno
durante gobernacion Mike Eman.

E caso a haya un rabo largo cu a cuminsa cu atake pisa di lider di AVP hunto cu e
fraccion di AVP contra Ministerio. El a culmina cu acusacion di miembro di Parlamento
pa AVP Melvin Tromp contra e miembro di Parlamento pa MEP, Rocco Tjon.

Si generalmente acusacionnan di un ciudadano contra otro no ta wordo acepta sin mas
dor di instancianan, den e caso di Melvin Tromp for di 2017 no tabata tin reaccion ora e
tabata culpa su contrincante politico Rocco Tjon di crimen sumamente serio.

Cerca pueblo a keda preguntanan serio pakico Tjon ta den Parlamento si el a wordo
sentencia dor di Hues y haya culpabel di un crimen.

Hecho ta cu e acusacionnan di parti di Melvin Tromp a wordo publica y na cierto forma

asina acepta, pa motibo di e forma cu e tabata acusa Tjon di un crimen serio y hopi
sentimental, emocional, pa Aruba.

E siman aki, despues cu autoridad a cuminsa investigacion contra Benny Sevinger y

miembronan conoci di AVP pa asunto di tereno, Melvin Tromp a bolbe bini dilanti cu su
acusacionnan y tabata papia di un sentencia di Hues. El a hasta acusa Tjon di a entrega
e keho contra cierto personanan pa motibo di vengansa.

Ya cu e ta un miembro di Parlamento el a haya oportunidad di publica su acusacionnan
sin cu a exigi su persona pa duna prueba di su acusacion di un crimen y actonan cu por
considera di corupcion.

Grandi tabata e sorpresa ora Rocco Tjon a bini dilanti pa mustra cu ta Mike Eman y
Benny Sevinger mes mester splica pakico na 2016 nan a nombra su persona den
posicion halto na prizon aunke e caso civil, pues no penal, a wordo trata dor di hues for
di 2010.