Page 7 - RDA

4 Djaweps 8 Febrüari 2018
Segun ‘Final report Technical report Audit di ED Technologies Texas
Refineria Isla ‘time bom’

WILLEMSTAD. - E organisashon ku ta sali na defensa di medio ambiente aki na Kòrsou, SMOC a pone e ‘Refineria di Kòrsou
Technical Audit Report” riba
nan wèpsait. Ta trata di un
rapòrt devastador ku a keda
trahá pa E&D Technologies
LLC Texas, riba petishon
di Management of the
Multidisciplinary Project
Team (MDPT) i ku a keda
entrega na MDPT na mei
2017.
Ta trata di un rapòrt ku
ta konta ku 82 paginá i ku ta
duna un bista hopi peligroso
di Refineria Isla.
SMOC a duna di konosé
ku den e 17 añanan ku nan
tin di eksistensia, nunka
nan a topa algu manera e
rapòrt aki ta deskribí. Den e
terminologia den e mundu di
plantanan, ta hasi menshon
aki di “run to failure”.
E rapòrt ta revelá vários
peliger agudo ku e refineria
ta den. Tur esaki pa motibu
ku no tin e kontrolnan
nesesario riba e planta. E
loke ku ta tumando lugá ta
lapi ta lapi e refineria aki ku
tur e konsekuensia ku esaki
por trese kuné.
E rapòrt ta hasi menshon
ku na Bèlgika, asina tabata
lapi un refineria ku un
dado momentu a surgi un
eksploshon grandi ku dos
morto ku despues a haña e
parti di e kurpanan plamá
riba henter e tereno na pida
pida.
Konklushon ta ku e
kondishon di Refineria Isla
ta di tal forma ku tur dia
bida di e trahadónan ta
na peliger, sigur si no hasi
nada pa trese un rumbo
otro den e planta aki, esta
di kuminsá pone atenshon
riba mantenshon.
Ta hasi menshon ku e
unidat di destilashon di
e “catcracker” ta den un
situashon asina deplorabel
ku esaki por eksplotá un ora
pa otro.
Di e forma aki e rapòrt ta
sigui hasi menshon di hopi
aspekto ku defakto ta pone
ku refineria ta un “time
bom” riba su mes.