Page 24 - MIN JUS - APRI 23,2015

Comparti

Minister di Husticia mr. Arthur Dowers cu orguyo a anuncia un fase nobo pa implementacion di e
programa “Camera Toezicht” cu ta un herment mas pa combati criminalidad.
“Camera Toezicht” ta un proyecto di Minister Arthur Dowers cu a wordo inicia 3 aña pasa pero cu bou di
e actual periodo di Gobernacion a cuminsa move den forma acelera. El a tuma su tempo, segun e
mandatario a splica, pasobra el a wordo atendi di un forma hopi serio y esaki tambe a pone cu aworaki
un gran parti di e infrastructura di e proyecto aki ta estableci y por cuminsa cu e fase di haci testnan.
Segun el a splica, durante e test lo bay mira si e ta haci e trabou di capta areanan cu nan kier pa ta den e
bista di e filmacion. Ta basa riba e resultado aki, lo determina ehecucion di e siguiente fase y si mester
adapta e posicion den cual nan a wordo poni.
E proyecto aki ta un contribucion grandi den e maneho stipula door di Minister di Husticia pa baha e
cifranan di criminalidad mas ainda.
Minister Dowers ta masha contento cu na momento cu a presenta e proyecto a haya bon cooperacion di
departamentonan manera Cuerpo Policial y SETAR. “E no ta un proyecto cu ta bay hopi facil. Mi a ripara
den pasado na varios ocasion e embergadura di e proyecto a wordo subestima, pa cual a dicidi di dedica
tur tempo necesario a dje. Awor nos a yega na un fase caminda por bisa cu den algun luna mas e lo ta
completamente cla.”
Un gran parti di tempo di e proyecto aki tabata concentra riba e aspectonan tecnico, pero tambe e parti
huridico y di personal cu ta bay traha cu su implementacion. Den e fase aki ta bay cuminsa cu e proceso
di adkiri e personal necesario, for di seno di Gobierno, cu lo mester bay traha for di momento cu cuminsa
haci e testnan necesario. “Mi tin tur confiansa cu mirando e retonan cu nos paisnan a confronta, lo tin
hopi hende trahando den Gobierno lo solicita y duna un man na aumenta e siguridad di nos pais.”

http://www.24ora.com/politica-mainmenu-18/94428-minister-dowers-awor-ta-den-e-fase-di-test-di-e-
projecto-di-camera-toezicht