Page 20 - MIN JUS 1 MAART 2016

Esnan cu tabata keda cas pa kiko cu ta mester bay tene nan
mes na cierto regla trahando na KIA

Monday, 29 February 2016 21:43
Comparti

Un di e cosnan importante ta cu tin cu informa dunado di trabao y SVB kico ta e adres di ziekmelding.
Asina minister Arthur Dowers a splica durante un entrevista relaciona cu e reglamentonan pa
ziektemelding na KIA. Un di e reglanan ta unda bo ta permanece na momento cu bo ta malo. Por
controla na cas of na e cas cu bo ta keda na momento cu bo ta malo.

Bo no por meld ziek y despues ta constata cu bo ta den concierto of cualkier otro caminda, of riba veld di
bala. Bo mester ta na bo adres sigur e prome dia y si acaso cu bo tin un regimen special, na momento cu
bo ta malo, esey mester palabra hunto cu SVB y e ora SVB lo stipula kico ta e condicionnan bao di cual cu
bo por bandona bo luga di malesa. Si bo meld ziek den exterior, tambe ta wordo exigi, sea cu bo tin
vakantie na Aruba of den exterior cu vakantie, pa duna na bo doño di trabao, e adres cu bo ta malo y
tambe pa bin cu un carta di dokter reconoci, cu bo tabata malo, bo no mester di bisa exactamente e
detayenan di e malesa. Si en caso cu esaki wordo stipula den un carta, e ora e carta tin cu entrege na SVB
pa nan bay di acuerdo si of no cu e trahado tabata malo. E cosnan aki ta trece cune cu e personanan cu
den pasado tabata por ta dicidi di keda cas hopi mas lihe cu tabata normal, awor aki nan tin cu bay tene
nan mes na cierto reglanan y tin diferente otro stipulacionnan den dje, caminda cu Dowers no a bay den
detaye. A wordo determina e oranan cu ta meld ziek y bao di cua condicion. Tambe stipula na unda lo bo
ta y si bo meld ziek na trabao, kico ta e areglonan cu tin cu sigui. A wordo stipula, na momento cu bo ta
malo, unda bo ta keda y na ken bo tin cu meld. Na momento cu haya for di doño di trabao posibilidad pa
sea bay traha bek completamente of bao di cierto afspraaknan, esey tambe ta stipula bao di ki condicion
por tuma luga y si bo no ta di acuerdo cu esey, kico ta e pasonan cu tin cu tuma. E punto di salida
principal ta pa tur hende sa kico nan tin cu tene nan mes na dje. Kier pa tur hende tene nan mes na
cuenta y si no tene nan mes, e lo bay tin consecuencia. Varios biaha por a mira e hecho cu un hende no ta
mantene su mes na regla, ta pone otro di nan pensa cu nan no mester tene nan mes na regla y un cos
tambe por mira ta cu e comportacion di cierto trahadonan tin consecuencianan fastioso pa otro
trahadonan y kier elimina esaki. Punto di salida ta cu na cuminsamento di Maart, lo bay duna
informacion na cada trahado y despues di esey ta bin na vigor y ta supone of ta spera cu awor aki door di
e publicidad cu ta wordo duna cu e reglamento aki tey, tur hende sa cu nan tin cu tene nan mes na dje y
cu tin consecuencia si no tene nan mes na dje, e minister a comenta.

http://www.24ora.com/local-mainmenu-5/105840-esnan-cu-tabata-keda-cas-pa-kiko-cu-ta-mester-bay-
tene-nan-mes-na-cierto-regla-trahando-na-kia