Page 5 - AM210414

Diaranson, 14 April 2021 AWEMainta 5

Unico na Aruba cu e swab special pa mucha

LabHOH awor tambe specialisa

den test mucha pa Covid-19

ULTIMAMENTE ta scucha mas y mas cu muchanan
ta test pa Covid-19 paso nan tin sintoma of nan tabatin
contacto cu un persona cu a test positivo pa Covid-19.
Mirando e desaroyonan aki desde algun tempo caba
LabHOH no a para keto y a busca un manera mas
“kidfriendly” pa test muchanan y sigur un metodo cu tin
valides cu ta loke semper LabHOH a para pe.

N’e diferente testcenters di LabHOH, esta e localidad na
Hospital y tambe e localidad na Palm Beach Plaza desde
awe ta test mucha diferente cu adulto. E testagents a sigui
un training special na unda na prome lugar ta tuma mas
tempo pa pone e mucha sinti nan mes trankil y ta splica
nan kico lo bay pasa ora di test pa Covid-19.

Pa haci e proceso aki uno mas agradabel posibel p’e
mucha te cu 12 aña e testagents di LabHOH ta haci uzo
awor di un swab cu ta flexiblel y hopi mas fini y pues no
ta molestia e mucha.
E test cu mucha awor ta ser haci cu e metodo conoci
como “mid-turbinate”. Haciendo uzo di e metodo aki e
swab tin cu bay menos profundo den e nanishi esta 1 pa
2cm dependiendo di e edad.
Mey mey di e nanishi ta swab e mucha cual ta menos
molester pe. E metodo di test aki tambe ta bay hunto cu
e test den garganta cu ya nos conoce.

E metodo “mid-turbinate” aki a ser valida ultimo pa
GGD Amsterdam y GGD West Brabant pa muchanan te
cu 12 aña ya LabHOH ta contento cu awor tambe por
haci esaki p’e muchanan di Aruba.
Pues asina aki LabHOH kier a garantisa y alabes trankilisa
mayornan cu si nan yiu tin cu test pa un of otro motibo
LabHOH awor mas cu nunca te’y pa wanta nan man y
guia durante e proceso aki.