Page 36 - MIN JUS OCT 23, 2015

Vice Presidente di Ordo di Abogado ta confirma cu
Duijneveld no mag di carga titulo di abogado mas

Publication: Friday, 23 October 2015. Categoria: General

Noticia di DIARIO confirma

ORANJESTAD(AAN): Anteriormente den
Raad van Toezicht a cay e decision cu Edwin Duijneveld no mag di eherce e profesion di
abogado mas y e ta worde kita for di e lista di abogadonan cu ta inscribe na Corte Comun di
Husticia di Aruba, Corsou y e otro islanan.

Duijneveld a apela su caso y e siman aki, Vice Presidente di Ordo di Abogado, Hans Sjiemfat a
confirma cu Raad van Appel a dicid cu confirma e decision di Raad van Toezicht y ademas a
dicidi cu e decision aki lo worde publica riba e website di Corte Comun di Husticia.

Sjiemfat a splica cu tin dos tribunal cu ta dicidi casonan disciplinario contra abogadonan ora tin
keho. Den e caso di Edwin Duijneveld tabatin cierto keho cu a conduci na e decision di e prome
instancia di tribunal, cu ta e Raad van Toezicht.

Despues di su apelacion y e decision di Raad van Appel, Edwin Duijneveld no tin opcion pa
apela mas di acuerdo cu nos leynan nacional, Sjiemfat a bisa. Loke e ex-abogado por haci ta
kisas bay cerca Corte di Derechonan Humano di Union Europeo, pero en todo caso na Aruba no
tin mas recurso pa apela contra e ultimo decision.

Duijneveld por, sinembargo, actua como consehero legal, pero e no por hiba e titulo di abogado
nip or actua den corte como abogado; e por pues sigui eherce e profesion di consehero legal, pero
no bao di e titulo di abogado, Sjiemfat a agrega.

Sjiemfat a expresa cu danki Dios casonan asina no ta pasa frecuentemente pasobra tur ora cu
algo asina tuma luga e ta un situacion lamentable no solamente pa e persona concerni, pero
tambe pa e profesion di abogacia y e comunidad.
http://www.diario.aw/2015/10/vice-presidente-di-ordo-di-abogado-ta-confirma-cu-duijneveld-no-mag-
di-carga-titulo-di-abogado-mas/