Page 26 - awem,july16

26 AWEMainta Diahuebs, 16 Juli 2015

Prome Minister Eman y Alcalde di Toronto John Tory na
competencia di BMX caminda Aruba a haci un bon papel

E Alcalde ta wak dilanti
na un bishita pa Aruba

NA ‘Centennial Park Pan Am BMX Centre’, Prome Minister

Eman y Alcalde di Toronto, sr. John Tory a pasa algun rato
ameno ta sigui seleccion di Aruba competi den e prome
competencianan di BMX durante di Weganan Panamericano
cu ta tuma lugar na Toronto, Canada e aña aki.Prome Minister
di Aruba ta na Canada como orador invita di ‘The Toronto
Global Forum’ bou di auspicio di ‘The Intenational Economic
forum of the Americas’. For di su agenda hopi ocupa, Prome
Minister di Aruba a tuma tempo pa anima e hobennan di Aruba
competiendo den e Weganan Pan-Americano.

Hunto cu Alcalde John Tory, a presencia e prome competencianan
y a bisa di ta contento di por t‘ey pa wak Aruba competi.
“Mi ta hopi orguyoso di por tin un delegacion di Aruba tambe
presente den e Weganan Panamericano y nan a lucha hopi te
na final,” el a duna di conoce.E dos mandatarionan a combersa
riba varios topico y na final a duna un entrevista chikito caminda
cu Prome Minister a recorda cu un parti substancial di nos
turistanan ta procedente for di Canada.

“Pa nos ta un honor pa ta na Toronto. Nos ta un pais asina chikito
presente entre e paisnan grandi den e competencia aki. Y e
recepcion pa nos tabata hopi caluroso.” Alcalde Tory mesora a
reacciona bisando cu Aruba por ta un isla chikito, pero tin masha
hopi Canades ta bishita e isla y lo keda bishita e isla. “Ami mes
no tabatin e suerte di por a bishita Aruba, pero mi casa tabata
na Aruba y el a bisami cu e ta un isla bunita cu biento dushi cu
ta supla constantemente, cayente, e lama ta cayente y el a te
hasta hunga golf na Aruba. El a conta’mi tur esey y mi ta wak
dilanti na bishita e isla, specialmente cu awor mi a conoce boso
Prome Minister y wak boso tremendo atletanan competiendo
aki n’e Weganan PanAmericano na Toronto.”

Naturalmente el a haya un invitacion di inmediato for di Prome
Minister Eman p’e bishita Aruba y disfruta di un descanso.