Page 4 - MIN VOS DEC 30,2015

grandinan na un prijs rasonabel. Lo yuda nan hisa nan calidad en general na un forma cu nan por
mantene nan prijs rasonabel tambe.
Un di e investigacionnan mas importante cu e plataforma ta trahando riba dje ta e documento cu ta defini
kico e necesidad den cuido ta, kico Aruba tin di ofrece caba y con ta "kortsluit" e dos factornan aki cu otro
pa yega na un balans y tambe haya sa kico ta haci falta.
Minister Schwengle a agrega cu SABA tambe lo ricibi sosten pa haci su wachtlijstnan mas cortico, como cu
kisas tin 100 persona riba nan lista di espera, pero e lista no ta realistico. E solucion no ta mas cama, el a
subraya, pero mester bin cu miho solucionnan.
Den un sondeo haci recientemente mayoria hende grandi a expresa cu nan ta prefera keda nan cas of
ricibi sosten den nan mesun bario. Minister Schwengle ta di opinion cu e miho forma pa realisa esaki ta
pa inverti den Wit Gele Kruis, cual lo resulta den mas sosten y guia na cas y den barionan.
El a añadi cu si 20% di clientenan por ta na nan mesun cas unda cu nan ta comodo y contento, mester por
ofrece un miho sistema di cuido den nan mesun bario cu ta na un prijs rasonabel. Esaki ta un proceso cu
mester realisa entre diferente instancia specialisa.
Deporte

Den e area di deporte, e mandatario a bisa cu tin diferente desaroyo andando cu kisas ainda no ta bisto pa
comunidad. Un di e proyectonan mas importante ta e establecimento di e comision di subsidio den forma
di un fundacion. E fundacion mester tin su director y un team chikito cu ta traha no part-time, pero full
time dedica na deporte.
E fundacion mester tin codigonan moderno di "good governance" cu guia di gobierno, pero no maneha pa
gobierno. Lo bin un Raad van Toezicht cu lo percura pa e supervision.
Minister Schwengle a subraya cu e "veld" mester bay logra e logronan. Un minister para tur dia riba veld
no ta bay drecha deporte, e ta gewoon show, el a agrega. El a bisa enfaticamente cu e cos cu ta bay drecha
deporte na Aruba ta maneho y specificamente e maneho di placa.
E titular di deporte a remarca cu mester percura pa cada cen cu hinca den deporte bay tambe pa deporte,
pa e mucha cu ta eherce deporte, pa expande e oportunidadnan pa e muchanan y pa ofrece mas mucha e
oportunidad pa haci deporte.
Un di e logronan grandi di 2016 ta e finalisacion di e trabaonan na Joe Laveist Sport Park, unda cu lo bin
un comision pa organisa actividadnan deportivo y familiar un biaha pa luna. E mandatario a bisa cu e
eventonan aki no ta solamente relaciona na baseball, pero otro deportenan cu ta y por wordo eherce na e
centro deportivo renoba.
El a bisa cu lo cuminsa haci diferente trabao di mantencion tambe na e otro facilidadnan grandi, esta esun
na Noord y esun na Oranjestad.
Calidad den Cuido
Minister dr. Alex Schwengle ta splica cu su enfoke mas grandi y loke a atrae pa drenta politica ta su
preocupacion pa cu e calidad di cuido na Aruba. No tin un bon definicion di cierto parametro cu mester pa
defini calidad y no tin control, el a bisa, agregando cu den e sentido aki 2016 ta un "turning point" tambe,
cu institucion di e organo independiente cu lo percura pa Inspeccion riba tereno di cuido den su
definicion mas amplio.
El a comenta cu pa cu esaki dos Landsverordening importante a ricibi aprobacion, esta esun cu ta defini
calidad di cuido y e AruBIG, cu ta defini calidadnan y nivel di conocemento necesario di esun cu ta brinda
cuido.
E profesional cu ta bin di Hulanda cu su BIG registratie por wordo inscribi pa traha na Aruba sin

problema, pero tur otro caso lo aplica e AruBIG. Den pasado foutnan grandi a wordo cometi ora di firma
pa un dokter cu no tin su BIG registratie por traha na Aruba y esey mester bira un cos di pasado, el a
splica.
Hunto cu Inspectie lo percura pa implementacion di e leynan aki.
Minister dr. Alex Schwengle a haci mencion breve tambe di e proyecto di expansion y renobacion di Dr.
Horacio E. Oduber Hospital y cu tin desaroyonan pendiente pa cu IMSAN tambe.
El a subraya e importancia un biaha mas di e salanan di operacion cu ta wordo agrega na e proyecto di
hospital. Salanan di operacion di standardnan halto internacional ta un "condicion" pa turismo; nan ta
importante en conexion cu e confiansa cu aerolineanan y otro partnernan den turismo tin den Aruba pa
por brinda e miho cuido na nan clientenan durante di nan estadia riba nos isla si esaki ta necesario.
E ta pues un di e condicionnan pa exito di "nos lifeline economico". E no ta un luho of un escogencia. E
hospital mester ta completamente ekipa pa trata cualkier eventualidad cu un turista, como tambe pa
brinda cuido di calidad na cada miembro di nos comunidad.