Page 53 - AVP
P. 53
Durante e siman nobo, AVP mester splica pueblo di Aruba pakico el a tene secreto cu e
señora di candidato number 9 riba lista di AVP ta un persona conoci pa Husticia na
Hulanda y tabata parti di otro investigacion criminal mas di su persona na 2017.
Ni Richard Visser, ni Mike Eman cu a presenta Richard Visser personalmente na su
regreso den partido y riba lista, por argumenta cu nan no tabata na haltura di e
problemanan di Aysel Erbudak cu Husticia na Hulanda.
Na momento cu AVP na 2017 a aproba e lista di candidato y a presenta na Aruba e
personanan cu a drenta Parlamento di Aruba, Mike Eman cu hasta ta tene “gastcollege”
na Aruba tabata na haltura di e problemanan serio cu Aysel tabata tin pa hopi tempo cu
Husticia y cu chens tabata grandi cu Aysel a worde encarcela.
Ni Richard Visser ni AVP tabata honesto cu Aruba, cu a worde presenta cu un candidato
pa bay representa pueblo di Aruba y no a papia berdad cu Aruba ora e persona di Aysel
a worde interoga na Aruba.
E unico informacion cu publico di Aruba a ricibi oficialmente riba Aysel tabata cu a
desmenti cu Aysel a bay dirigi hospital di Aruba contra un salario enorme.\
Hasta den e caso aki no a bisa cu lo tabata imposibel pa Aysel bira director di hospital
pasobra ley no ta permiti un persona cu e pasado di Aysel, e falta di cualificacion pa
dirigi e hospital y pio ainda un sospechoso oficial di husticia, pa dirigi hospital di Aruba.
Aysel a confronta Aruba manera un santo cu hunto cu su compañero di bida, Richard
Visser, a bira victima di personanan cu tabata kier a bay contra futuro politico di
Richard Visser.
AVP a permiti Aysel y Richard Visser haci Aruba kere cu tabata permisibel pa Richard
Visser drenta Parlamento di Aruba sin mancha nomber di Aruba door di su relacion cu
Aysel, cu awe ta condena na prizon a base di un caso cu Richard Visser y AVP conoce.
E caso aki no tin nomber mas ainda si tene cuenta cu e forma cu corantnan Hulandes ta
presenta Aysel y Richard cu awor si ta haya publicidad pa medio di e caso penal den
Corte di Husticia na Hulanda, caminda Aysel a worde condena como delincuente
directo.
