Page 57 - MIN ON 10 NOV 2015

Salida di miembronan di SMOA tabata anuncia caba

Publication: Tuesday, 10 November 2015. Categoria: General

Hunta di Supervision den combersacion cu remplazantenan

ORANJESTAD (AAN): Diaranzon cu a pasa, tres miembro di Hunta di Supervision di
Stichting Middelbaar Onderwijs (SMOA) a entrega nan retiro. SMOA ta supervisa Colegio
Arubano.

Salida di e miembronan aki tabata anuncia caba, pero a tuma lugar mas lihe cu tabata planea.
Hunta di Supervision lo yena e lugarnan di e miembronan saliente mas pronto posibel. Na mes
momento lo tene cuenta cu salida di un di cuatro miembro dia 1 di februari 2016. Esaki ta conoci
algun tempo pasa caba.

Hunta di Supervision ta den combersacion caba cu esnan cu ta bay reemplasa nan. Na momento
di yena e lugarnan cu a bin liber, lo tene cuenta cu resultado di e discusion si e Hunta di
Supervision ta keda cu siete miembro of cu e cantidad aki lo bira menos.

Den e ultimo tres añanan Hunta di Supervision hunto cu gerencia di e scol a trata algun tema
importante di cual algun ya a keda concretisa: a realisa un structura di control nobo na momento
cu a adapta e statuutnan cu tabata antigua; e proceso financiero a wordo reforma loke a conduci
na entrega na tempo di e cuenta anual 2014 cu aprobacion y presupuesto 2016; a start cu algun
proyecto entre nan enseñansa den dos idioma y digitalisacion di enseñansa. Tambe a percura pa
un sucesor di e rector como Presidente di Hunta di Gerencia. Banda di esaki Hunta di
Supervision a yuda den duna guia na algun proceso di renobacion di enseñansa manera e
conexion cu e protocol di Hulanda encuanto e exigencianan di examen pa HAVO y VWO y e
conexion entre MAVO y HAVO.

E statuutnan nobo ta dicidi – den liña cu principionan di bon gobernacion – cu miembronan di un
organo di supervision ta keda pa un periodo defini. Den e caso aki pa e periodo di tres aña.

Cu miembornan di e Hunta di Supervision ta bay no ta nada straño. E cooperacion den e Hunta
di Supervision y cu e Hunta di Gerencia ta bon. Tin un plan di maneho strategico 2015-2019 riba
mesa cu hopi ambicion y Hunta di Supervision tin masha gana pa cuminsa traha hunto cu Hunta
di Gerencia, organisacion y Minister di Enseñansa pa di e manera aki contribui positivamente cu
enseñansa na Aruba.

http://www.diario.aw/2015/11/salida-di-miembronan-di-smoa-tabata-anuncia-caba/