Page 63 - MIN ARENDS

Stephen Daal: Gobierno mester libera comercio mas

Sunday, 09 July 2017 19:04

Comparti

"Mi a enfoca hopi riba e road-blocksnan cu Bo ta haya den e proceso di logistica”, asina Stephen Daal,
kende ta socio y alabes miembro di hunta di directiva di Interport Logistics Aruba, a bisa despues
di su presentacion diasabra mainta na e Small Busines Event den Renaissance Convention Center. E
tabata critico riba e hecho cu comercio mester tin mas libertad pa haci negoshi, sin tanto control y
burocracia di parti di Gobierno.

“Manera tur hende sa, logistica ta un proceso hopi complica, cu por bay den diferente area cune. Pero
loke mi a purba splica ta, cu den comercio, si Bo tin un liña stret ta cana sin ningun deuk den dje, cu
cosnan ta bira mas facil, mas eficiente, ta baha costo nan halto y mas", asina Stephen Daal di Interport
Aruba a aclaria.

"Un di e roadblocknan ta cu Gobiernonan, no esun aki so sino tur, cu Gobierno no kier libera comercio.
Si comerciantenan sa cu nan lo perde nan permiso di operacion si nan faya, nan lo cana stret. Si Bo ta
core auto y Bo sa cu Bo drenta den verboden cu lo bo haya un boet, lo Bo no haci'e tampoco. Wel, e tipo
di cosnan asina mester bin. Esey mi kiermen cu liberalisacion di comercio. Laga nos traha, pone sancion
halto, di moda cu ta cana corecto”, asina e comerciante y alabes ex Presidente di ATIA a enfatisa.

E ta convenci cu menos metemento di Gobierno tin den e proceso di haci negoshi, specialmente den e
industria di logistica, anto automaticamente lo por spera mas inversion, mas eficiencia y progreso
pasobra e comerciantenan lo no tin miedo di tur e roadblocksnan cu tin awendia.