Page 6 - AM200922

6 AWEMainta Diamars, 22 September 2020

Participacion di MANA n’e serie di

webinar di MAC ‘In Conversation’

‘Museums Association of the Caribbean’ (MAC) tin como meta pa crea
un ‘network’ visible y acessibel pa museo y profesionalnan di museo di
Caribe pa comparti conocemento y expertisio.
MAC a organisa un serie di webinar “In Conversation” cu a termina 17 di
september ultimo cu participantenan di Caribe Hulandes.
Museo Arqueologio Nacional Aruba (MANA) tabata un di e panelistanan
unda participantenan a intercambia informacion cu publico ‘online’ riba
impacto di Covid 19. E consecuencia, cambionan y adaptacion dor di e
crisis actual a wordo presenta.

E panel tabata consisti di Natasha Joelle Silva, Hefe di conservacion di
Fundacion Parke Nacional Aruba, dr. Delno L.A. Tromp, Director di
Museo Kura Hulanda na Corsou, Marguerita Wever, Hefe di seccion di
Educacion y Presentacion di MANA y Michèle Russel-Capriles, Presidente
di Museo Historico Cultural y tesorero di Landhuis Bloemhof na Corsou. E
moderador tabata Arminda Franken-Ruiz di Aruba, specialista di herencia
Caribense y consehero di Mondriaan Fonds.

A resalta cu cada organisacion a conoce un caida drastico di bishitante,
specialmente turista. Cada organisacion a bira creativo y a busca formanan
diferente pa atrae gruponan chikito y di forma digital.
E reto ta con pa desaroya otro formanan tanto digital como real pa mantene
interes publico local y internacional.
Esnan cu tin interes di mira e otro webinarnan di Caribe Ingles (13 di
augustus), Caribe Spaño (19 di augustus) of Frances (27 di augustus) por
mira e grabacion via https://caribbeanmuseums.com/virtual-program/.
Tambe por subi e website di MAC pa haya e raport di e encuesta cu MAC
a haci na april ultimo bou museonan den Caribe tocante e impacto di
Covid-19 riba nan organisacion.

MANA ta hopi contento p’e oportunidad pa participa n’e plataforma
internacional aki. Asina por a contribui, intercambia y haya mas idea pa
posibilidad nobo pa keda den contacto cu y envolvi publico.
MANA ta gradici MAC pa su sosten na Museonan den Caribe y p’e
iniciativa di organisa e serie di webinars aki.
E webinar di “In Conversation” Caribe Hulandes por a tuma lugar danki
na sponsoring di Office of Strategic Partnerships di Smithsonian National
Museum of African American History and Culture.