Page 16 - AM230421
P. 16
16 COMUNIDAD AWEMainta Diabierna, 21 April 2023
Embahador di Republica Dominicana
a bishita Minister Thijsen
en Haag – Embahador di Republica Dominicana na Hulanda Juan Bau-
Dtista Duran a haci un bishita oficial na Minister Plenipotenciario mr. Ady
Thijsen. E motibo di e bishita ta pa embahador Bautista Duran a combersa
cu Minister Thijsen riba un cumbre cu Republica Dominicano kier organisa
e aña aki riba e tema di siguridad di alimento (food security) den e region
di Caribe.
Tabata Minister Thijsen cu durante e recepcion na ocasion di e Dia Nacional
di Republica Dominicana a trece e tema aki bou atencion di embahador
Bautista Duran durante un combersacion breve cu e mandatario tabata
tin cu e embahador. Den bista cu e tema aki ta sumamente importante pa
e region Caribense, embahador Bautista Duran a bisa cu proximamente
e lo biaha pa Republica Dominicana y lo papia e tema aki cu e Minister di
Asuntonan Exterior y despues e por informa Minister Thijsen e decision di
Gobierno di Republica Dominicana tocante e iniciativa aki.
E cumbre mester traha pa yega na un
forsa regional cu participacion di e islanan
Caribense y Surnam. Banda di alimentacion,
tambe lo toca e tema di awa potabel, cu ta
un problema regional door di contamina-
cion y escasez. Den esaki Aruba por hunga
un rol importante, segun embahador Bautista
Duran, mirando e experencia cu e isla tin den
e proceso di destila awa di lama den awa
potabel.
E embahador a bisa cu e decision pa busca
acercamento cu Surnam ta e motibo cu
Surnam ta un pais grandi y tin hopi potencia
pa produci fruta y berdura. Otro aspecto
importante cu e cumbre lo mester atende, ta
e situacion logistico entre e islanan Caribense
cu ta cardinal pa distribui e productonan.
Embahador Bautista Duran a bisa cu mas
tempran e cumbre aki por wordo teni ta na
final di juli of na November di e aña aki. Por
ultimo embahador Bautista Duran a gradici
Minister Thijsen pa su vision pa e desaroyo,
cooperacion y bienestar di e region Caribense.
Potret cortesia di Arubahuis
