Page 16 - KPA 30 MAART 2016

Mucha muhe di 22 aña future maestra a fayece na cas den
presencia di su pareha

Publication: Tuesday, 29 March 2016. Categoria: Policial

ORANJESTAD (AAN): Diadomingo mainta trempan na Noord un hoben a bati alarma ora a ripara cu su novia no
tabata reacciona mas riba cama.

Di biaha ambulance ta yega na e cas cu ta keda den e area poco zuid-oost di Willy’s Pool, y e Paramediconan a
cuminsa traha cu e mucha muhe pa reanime. Pero tur esey tabata envano, pasobra posibelmente tabatin algun rato
morto y no por a haya pulso mas despues di varios intento.

Esaki a pone cu polis tambe a presenta pa start un investigacion grandi cu fiscal wak si por ta trata di crimen. Alto
Comisario di Polis tambe tabata presente debi cu ta un caso serio y e mester ta na altura di lo tur paso cu ser haci.

Famia di e mucha muhe tambe a yega na e cas y aki e mayornan a drenta panico di e sucedido di nan yiu muhe,
cu tabata kedando cerca su guy.

Dr Mungra a presenta na e lugar pa constata morto di e mucha muher C.C.V. Semeleer naci na Aruba dia 26 di Juli
1993, pues tin 22 aña di edad, y muy popular cerca centenares di mucha como “Juffrouw Cici”.

DIARIO a haya sa riba Dialuna, cu e curpa a keda laga den libertad ya cu no ta trata di ningun crimen. E mucha
muhe na momento cu el a fayece e tabata den presencia di su pareha. No tabatin nada di bao influencia cu a tuma
lugar, ya cu den e camber tur cos tabata normal y limpi.

http://www.diario.aw/2016/03/mucha-muhe-di-22-ana-future-maestra-a-fayece-na-cas-den-presencia-
di-su-pareha/