Page 8 - flip hoh

 Politica

Tin cosnan pasando na hospital ta serio pa loke ta e destaho publico, pa loke ta e construccion di e hospital, cu ta
mustra di bay wordo traha sin un camber di operacion. Awor mester bay cambia tur cos pa haya mas placa pa traha e
sala di operacion, segun Andin Bikker di PDR.
E parlamentario ta sigui bisa cu lo bay haci pregunta y probablemente yama un reunion publico cu e minister
encarga cu Salubridad, riba e diferente acontecimento nobo cu a bin dilanti pa loke ta trata e sala di operacion, cu pa
x motibo no a wordo hinca den e destaho.
Ta ansioso pa sa si esey por ta motibo pa e esun cu e destaho a sali desfaborabel pe, bay cuminza cu un caso a base
di aanbestedingsrecht, pasobra con cu bay bin, tabata tin un destaho publico y lo por tabata tin un efecto.
Bikker ta sigui bisa cu normalmente ora cu haci un destaho, una bez cu kies, bay yega na otro riba cierto tipo di
acuerdo cu ta den cuadro di e destaho aki, cu e partido cu a gana e bid, cu kizas si e bid tabata completo, incluyendo
OK, esaki lo tabata tin un otro resultado pa e destaho publico. No sa esey y tin cu tende di e minister.
A base di otro informacion cu ta saliendo na cla, a compronde si cu con cu bay bin, si e partido aki tin derecho pa
bay den OK, e fase aki, hecho ta cu e ta bay costa como 15 miyon adicional cu lo por a wordo gespaar. Ora cu a
tuma nota cu por ehempel SKOA ta falta apenas 1 miyon pa aña pa e por subsidia e schoolgeld, cu a dal hopi
persona di menos recurso hopi duro, cu ta wak e ora cu gobierno su prioridad ta hopi abao.
Remarcando riba Schoolgeld, Bikker a ripara cu cada biaha AVP ta purba di ataca Bikker personal, bisando cu e por
paga 500 y pico florin pa luna of pa aña pa su yiu y esey no ta dun’e derecho pa sali na defensa di esnan di menos
recurso cu ta gana un salario minimo. Pasobra e minister encarga cu educacion ta core un Mercedes, ta bon pa hisa
invoerrechten riba auto tambe. Esey ta un filosofia ridiculo.
Andin Bikker, tin espacio pa paga un scol pa su yiu, pero esey no ta kita cu e ta representante di pueblo y gran parti
di su votadornan cu a deposita nan confianza den dje y e otro milesnan cu a deposita nan confianza den e partido,
obviamente gran parti di nan, pasobra 50% di nos poblacion ta gana un salario minimo, gran parti di nan ta gana mas
poco cu esey. Bikker ta sali como representante di pueblo y un biaha mas ta bisa esnan cu ta haci e remarcanan aki,
pa bay lesa constitucion kico un rol di un parlamentario ta.
Como representante di pueblo, Bikker ta pensa riba nan interes, cu nan ta bay cerca dje cu nan keho. Diasabra cu a
pasa, Bikker a bay haci compras y a bin topa cu un dama cu ta gana un salario minimo y a bin puntra Bikker riba e
schoolgeld, mirando cu esey lo bay dal’e duro. Esey ta tipo di personanan cu Bikker ta defendiendo. E ta haya baho
y falta di argumento di parti di AVP pa purba di ataca Bikker riba nivel personal pa wak cua scol su yiu ta bay.
Bikker no ta bay baha na nan nivel. Esey ta bisa algo mas di AVP, cu ta bisa algo di dje, el a finalisa.