Page 20 - DIGICEL

Lider di fraccion Marlon Sneek Fraccion di MEP kier hunga
politica populista sin solucion pa asuntonan di pueblo

Wednesday, 28 June 2017 17:26
Comparti

Durante reunion publico ayera mainta a keda confirma cu partido MEP simplemente no tin vision
politico pa sostene pueblo riba cualkier tereno. Lider di fraccion di AVP, sr Marlon Sneek a mustra cu e
tres miembronan di fraccion di MEP cu a duna acta di presencia na e reunion aki, tabata bisto cu partido
MEP no tin algo pa pueblo den futuro.

“Esaki ta resalta den nan disertacionnan, cuminsando cu e lider Evelyne Wever Croesm, cu a papia di
cantidad di cosnan negativo, critica maneho di Gobierno, cuestionando decisionnan di Gobierno, pero
sin un solo momento, bisa pueblo contenido di e vision di MEP pa nos pueblo. Ta hopi curashi Evelyne a
mustra ayera mainta ora cu el a insisti pa Gobierno paga ex trahadonan di Setar mas rapido posibel, ya
cu e hendenan aki a warda mucho hopi pa nan placa. Aki e lider di MEP ta bolbe mustra cu e no ta biba
cu pasado di su partido, ya cu ta Gobierno di MEP, dirigi pa Nelson Oduber, ta esun cu no kier a paga e
trahadonan di Setar nan placa cu nan tabatin derecho ariba. Ta gobierno di MEP no kier a regla e caso cu
trahadonan di Setar loke a conduci na varios caso den Corte te cu a keda dicidi cu e grupo aki tin derecho
riba nan placa y pa cual Parlamento mester a aproba e ley aki caminda porfin lo paga e hendenan aki nan
placa. Pueblo ayera mainta por a scucha tres miembro di MEP trata di cuestiona y critica e maneho di
Gobierno di AVP pero den e proceso aki ningun momento un di nan por a bisa kico MEP lo bay haci pa
pueblo. A cuestiona e aumento di salario minimo, e aumento di pensioen cu gobierno a duna na luna di
Januari di 2017 caba pero cu mester a bira oficial a base di e ley cu gobierno a presenta na Parlamento.
Ta bisto cu miembronan di fraccion di MEP ta demostra cu nan ta populista buscando pa saca probecho
politico den tempo di campaña pero na mes momento mustrando cu nan no tin solucion pa pueblo, no
tin nada pa brinda nos pueblo den futuro.

A papia di baha edad di pensioen, un plan cu a nace for di cabes di e lider di MEP, pero sin bisa con nan
lo sigura e futuro existencia financiero di e fondo di pensioen. Mesun cos pueblo por a scucha Dangui
Oduber papia di aumento di salario minimo cu den ocho aña di gobierno di AVP a wordo aumenta na
varios ocasion, pero ningun momento a bisa si partido MEP lo bay aumenta salario minimo y con nan lo
haci esaki. Den tur e critica cu e tres miembro di fraccion di MEP a haci riba maneho di Gobierno di AVP,
ningun caminda nan a duna pueblo un bista di kico ta e vision cu e partido aki kier bay asumi
gobernacion di nos pais. Ta realmente tristo scucha lider di MEP papia con e lo bay regla e fondo di
pensioen contando storianan riba coordinadornan y biahamento di Ministernan pero a lubida por
completo e suma di 28 miyon cu su famia a ricibi na huurmento di edificionan sin cu pueblo a haya un
cen preto bek for di e famia di e lider di MEP. E solo hecho cu fraccion di MEP a presenta cu solamente
tres miembro pa e reunion aki, ta confirma un biaha mas e falta di seriedad di e partido aki cu no ta
interesa pa traha pa pueblo, cu no ta interesa riba bienestar di pueblo pero solamente interesa pa sirbi
nan interes persona y familiar,” Parlamento Marlon Sneek ta mustra.