Page 5 - MIN ARENDS

Miembronan di prensa a haci bon uso di e oportunidad aki.

Asina POR a haya e pregunta tocante algun proyecto cu e partido kier impulsa, mientras cu
Aruba su situacion financiero ta dificil, debi na e debe grandi cu Gobierno a crea.

Otmar Oduber a reitera palabranan di Andin Bikker, den diferente oportunidad, cu
momentonan no dificil tur hende por goberna, pero den momentonan di crisis ta net ora
mester tin e vision, caracter y determinacion pa logra e prosperidad pa e pais.

E aspecto di debe enorme cu nos pais tin na e momentonan aki, POR ta mire den e aspecto
economico, y pa mehora esaki nan ta kere, na prome lugar, reduciendo gastonan di
gobierno, locual mester sosode atravez di privatizacionnan cu mester tuma lugar, y
naturalmente, independizacion di diferente departamento y servicionan di gobierno, cu no ta
pertenece mas na loke gobierno mester provee na servicio. Na final, e calculacion ta cu
entre 15 pa 20 porciento di e gastonan aki por wordo reduci den un periodo di cuater pa
seis aña.

Na di dos lugar, locual POR a identifica como e revolucion economico di Aruba. Un evolucion
economico basa riba cinco pia:

Percura cu loke a haci bon, turismo, por sigui diversifica, crea mercadonan nobo unda por
concentra riba aspecto medicinal, tereno deportivo, y otronan cu nos ta biba di dje. Sigui
concentra y crea e posibilidadnan pa aumenta e calidad di turismo cu nos tin awe.

Bin cu un ley di restauracion economico manera tin na Hulanda, pa haci posible e creacion
di un economia moderno, nobo, activo, progresista, manera cu POR ta para pe.

Crea un fondo di garantia, specificamente pa empresarionan chikito, atravez di un tipo di
fondonan di comunidad cu wordo crea a base di dividendonan social hunto cu sector priva y
duna beneficio na esnan cu ta participa.

Reduci e gastonan pa haci negoshi di esnan cu ta inverti na Aruba, y percura pa entrada di
nos comunidad wordo aumenta. Esaki atravez di move e forma fiscal di directo pa indirecto
unda ta reduci gastonan di loonbelasting, inkomstenbelasting y winstbelasting.

Creacion di tecnologia nobo como tambe impulsando e turismo y industrianan nobo na San
Nicolas.