Page 76 - KPA JUNE 30 2015

Strategia y profesionalismo a duna bon resultado pa e caso
grandi di labamento di placa

Publication: Tuesday, 30 June 2015. Categoria: Policial
Alto Comisario di Polis, mr. Adolfo “Dolfi” Richardson:

ORANJESTAD (AAN): “Semper mi ta bisa cu
e tipo di casonan grandi asina nos no ta resolve pa casualidad ni pa suerte”, esey tabata e prome
reaccion di Alto Comisario di Cuerpo Policial Aruba, mr. Adolfo “Dolfi” Richardson, despues cu
a bira conoci cu Cuerpo Policial di Aruba a logra resolve algun caso grandi ultimamente, den
cual a dal baho mundo varios sla duro, incluyendo un cantidad di droga, arma y placa efectivo cu
a tuma den beslag.
“Algun factor ta importante pa resalta den e tipo di caso asina, manera por ehempel e
profesionalismo di nos Polisnan pero tambe e importancia di traha hunto y di tin bon contacto cu
otro organizacionnan policial”, di acuerdo cu e hefe di e Cuerpo di Polis di Aruba.

Varios departamento hudicial ta traha hunto, bou liderazgo di Ministerio Publico, specialmente
pa motibo cu e delitonan sa crusa frontera y yega entre otro te Hulanda. Mester resalta cu e tipo
di casonan asina grandi sa ta complica, den cual mester aplica hopi strategia. Casonan cu awor ta
mira luz di dia, hopi bes a tarda añanan di investigacion, a inverti hopi tempo y placa pa awe por
a yega na e scenario aki, den cual Husticia ta cla pa presenta acusacionnan pa Corte evalua.

E Alto Comisario di Polis ta convenci cu aki atrobe Aruba a demostra su capacidad y su
profesionalismo, pa por investiga y resolve casonan di un magnitud grandi, cu hopi sospechoso
envolvi, suma di placa grandi y di cual e hechonan ta tuma luga na varios parti di mundo.

Cuerpo Policial Aruba a cana un caminda largo, den cual a prepara su Polisnan di forma adecua,
cu awe nos ta fungi hopi bes como ehempel den Reino Hulandes y den e region Caribense. Den e
proceso mester a inverti den conocemento, educacion, preparacion, pero paralelo na e proceso ey
a inverti den ekipo moderno pa por conduci investigacionnan tactico, aplicando strategianan
nobo y moderno.