Page 74 - KPA JUNE 30 2015

Hoben di 19 aña a haya 4 aña di castigo di cual 1 ta
condicional

Publication: Tuesday, 30 June 2015. Categoria: Judicial

Despues di maltrata y horta for di un anciano

ORANJESTAD (AAN): Recientemente e sospechoso N.J.A.B a presenta na corte di husticia,
debi na e hecho cu el a wordo acusa di, conhuntamente cu un otro of otronan, ladronicia cu
violencia den un cas, for di unda e lo a horta joyas riba 12 di Januari 2015.

E violencia a encera cu el a drenta den e cas cu cara tapa y/of a pone un pistool riba e persona
y/of a dal e cu un arma riba su cabez y/of a dal e cu mokete den su cara y/of a scop e y/of a grite:
“Placa, placa placa” y/of “No grita sino mi ta tira bo”.

E ta wordo acusa di posesion di un arma di candela riba mesun fecha.

Huez a puntra e acusado si el a comete e crimen y el a bisa cu no.

Huez a puntre tambe di un potret riba Facebook unda cu e lo ta para cu un arma di candela y el a
bisa cu e no tin y nunca el a saca potret cu arma di candela.

Den pasado N.B a yega si cay cera pa ladronicia despues cu hende a bisa cu nan a wak e den e
cas ta horta, pero el a bisa huez cu den e caso ey tampoco tabata berdad cu el a drenta horta den
cas di hende..

Huez a puntra e sospechoso di 19 aña con e ta wak su mes aki 10 aña y e hoben no tabata tin un
contesta.

Fiscal a indica cu e caso aki ta uno hopi serio, unda cu a drenta cas di un homber anciano, a
menaze cu arma, a scop y batie den su propio cas sin cu tabata necesario y a horta su
pertenencianan.

E homber asina lo keda cu un trauma pa semper, segun fiscal.

Fiscal a indica cu na e cas a haya fingerprints di N.B y e N.B no tin un bon splicacion pa e esey.

Banda di esaki e victima a reconoce N.B for di un potret, mirando cu durante e atraco N.B a kita
e mascara cu e tabata tin bisti.

Fiscal a exigi un castigo incondicional contra e sospechoso di 5 aña, kitando e tempo cu el a sinta
caba den detencion preventivo.

Despues cu abogado Nilo Croes a trece dilanti su defensa, huez a duna su veredicto.