Page 31 - Awe Mainta 18 April 2015
P. 31
awemainta.com Online Diasabra 18 di April 2015
Un encuentro cu autor Denis Henriquez
“Lenga di mi mama” y
“Aruban landscapes”
30 DIAMARS awor autor Denis Henriquez lo ta na Biblioteca pa un
presentacion special. Esaki ta cuminsa 7.30 y ta tuma lugar den
hardin di Departamento Arubiana/Caribiana na Bachstraat # 5.
Durante e encuentro aki autor Denis Henriquez ta presenta su
dos ultimo bukinan: “Lenga di mi mama” y “Aruban landscapes”
y Denis Henriquez ta papia tocante su bukinan y kico ta su inspi-
racion pa skirbi.
“Lenga di mi mama” y “Aruban landscapes” ta dos obra cu a keda
‘drumi algun aña. Den un entrevista Denis ta conta cu nan ta dos
obra “cu a keda drumi durante hopi aña. Den bes encuando mi tabata
repasa y edita e texto, cambia algo aki, kita algo aya. Aña pasa mi
a dicidi di stroba nan soño dor di laga mi amigo Wim Rutgers tira
un bista riba nan.
Ta Wim a conseha mi pa sigui traha riba un publicacion. Di un cos a
bin otro y e dos compañenan a materialisa den forma tangibel di dos
buki.” E dos bukinan ta publica cu sosten di UNOCA.
Denis Henriquez (’45) ta bon conoci den mundo literario di Re-
ino. Algun obra cu por menciona di Denis ta e.o.: Ariba tereno di
teatro: Mayan Dalia lo ta mi Dalia (1978), Fenchi a gana premio
mayo (1981), The Mad T-party (1983) y E soño di Alica (1988).
Den ramo di poesia: Kas Pabow (1988) y pa locual ta trata novela:
Zuidstraat (1992), Delft Blues (1995) y De zomer van Alejandro
Bulos (1999).
Denis Henriquez ta mas conoci serca studiantenan di tur tempo cu
por a scoge pa lesa ‘Zuidstraat’ pa nan lista di Arubaanse literatuur.
Zuidstraat ta duna e lesador un bista di e bida den un caya of bario
na Oranjestad den añanan cincuenta di siglo pasa.
Lo tin oportunidad pa haci e autor pregunta riba su bukinan, pero
tambe skirbimento.
Interesante pa tur esnan cu un curiosidad p’e mundo literario
y e proceso cu un autor ta pasa aden pa yega na un produccion
completo, su motivacion y inspiracion.
Un invitacion ta bay pa publico en general y muy en especial stu-
diantenan cu tin buki di sr. Henriquez riba nan lista pa conoce e
autor di cerca.
E encuentro aki ta otro siman diamars 21 di april den hardin di Aru-
biana/Caribiana na Bachstraat 5, Oranjestad, di 7.30 pa 9 or di anochi.
