Page 42 - ATA

Love Festival ta divulga su ‘Music

Boulevard’ pa su evento

Posted on 10/18/2017 8:53 am AST | Updated on 10/18/2017 11:20 pm AST
ORANJESTAD – Love Festival ta divulga su ‘Music Boulevard’ pa su evento. Den su
edicion 2017, e festival di organisacion local cu proyeccion internacional, ta trece awo e
‘Music Boulevard.’ E concepto aki ta bay crea riba tereno di Harbor Arena e dianan 3, 4
y 5 di november proximo, un strip di stagenan, cada un ofreciendo otro ambiente.

Fuera di e escenarionan riba cual artistanan local y di afo ta bay presenta, e ‘Music
Boulevard’ lo ta completo cu areanan VIP, Ultra VIP (hunto cu e artista riba stage),
suficiente bar, entertainment zone y ademas e area di ‘We Love Food Trucks Festival’.
Tur esaki a ser planea di tal forma cu e bishitante, tanto local como turista, ta haya un
experiencia grandi y unico. E no ta djis un concierto, e ta un festival completo.

E ‘Music Boulevard’ ta stretch di un punta pa e otro cuminsando mas pabou cu e ‘Techno
Stage’, sigui pa e ‘Underground Stage’. Cada stage lo tin, cada anochi, un repertorio di
DJ tocando nan respectivo genero. Mey mey ta haya e ‘Caribbean Stage’ riba cual lo
exhibi e ritmonan varia di rap, rock, reggae y te hasta asambeho. Den e area aki tambe lo
mustra nos gruponan di Carnaval.

Mas pariba di e ‘Music Boulevard’ bo ta haya ‘Heart Stage’ caminda por disfruta di
house music, entre otro estilonan electronico. Por ultimo, tambe lo tin ‘House of Dolls
Stage’, un area nobo cu lo brinda ademas di musica, espectaculonan visual creando asina
un ambiente totalmente diferente. E productornan responsabel pa e escenario y area aki ta
priminti di bin cu shownan nunca bisto.