Page 7 - KPA NOV 20,2015

Choller haya ta cana cu machete dilanti Hues

Publication: Friday, 20 November 2015. Categoria: Judicial

ORANJESTAD (AAN) – E caso penal cu Ministerio Publico a cuminsa contra e homber P.C. a
bay masha lihe. Esey pasobra cu e sospechoso P.C., un choller, no a presenta. Fiscal a pidi Hues
pa trata e caso toch y Hues a bay di acuerdo.

CANA CU MACHETE ROND

Fiscal a bisa cu e acusacion contra P.C. ta cu riba 8 di Maart 2015 e tabata cana arma cu un
machete. Polis a mir’e ta cana cu e machete y a detene di biaha. Fiscal ta haya legalmente proba
cu P.C. tabata arma.

El a bisa cu segun P.C., e ta usa e machete pa traha pero na opinion di Fiscal, no por imagina cu
un choller ta usa esaki pa traha. Fiscal ta kere mas bien cu P.C. ta usa esaki pa menaza hende.

CASTIGO CONDICIONAL

Fiscal a bisa Hues cu e ta haya cu P.C. tabata cana riba caya cu machete cu ta wordo considera
como un arma. Pa cu e castigo, Fiscal a tene cuenta cu e carchi di castigo di P.C. tin hopi
casonan di ladronicia y e ultimo caso ta data 2010.

Fiscal a bisa Hues cu normal den un caso asina ta exigi un multa. Pero den caso aki e multa no
tin validez pasobra e sospechoso no ta traha. El a exigi un castigo condicional di 1 siman di
prison cu un tempo di prueba di 2 aña.

Hues a cera tratamento di e caso y a dicta sentencia di biaha. Hues a bisa cu e ta haya cu a keda
legalmente proba cu P.C. tabata cana arma cu un machete y ta haya e exigencia di Fiscal na su
lugar. Hues a condena P.C. na 1 luna di prison condicional cu un tempo di prueba di 2 aña.
Tambe Hues a duna orden cu e machete lo keda confisca.

http://www.diario.aw/2015/11/choller-haya-ta-cana-cu-machete-dilanti-hues/