Page 16 - MIN JUS JAN 5,2016

Djamars 5 Yanüari 2016 39

Kontinuashon di pagina 38
MESTER TUMA

e áwaseru di bala ku
tabatin.

Konklushon:
E desishon algun aña pasá
(na 1999 i algun aña promé)
di parti di gobièrnu pa retirá
trahadónan sosial profeshonal
for di bario ta resultando
Kòrsou mas mecha ku sebu.
Den sierto sentido komunidat
di Kòrsou aki a kuminsá
slep bai abou den krímen,
brasando materialismo i
intoleransia. Gobièrnu ya e
tempu ei tabata den su afan
pa baha su gastunan i haña
grep riba finansa públiko.
Mira awor e konsekuensianan
di habri man laga famianan
problemátiko bai, e tipo
di kultura ku a surgi i ku
komunidat di Kòrsou ta keda
konfrontá kuné tur siman òf
tur luna! Hasta pafó di nos
frontera te aya na Ulanda
yunan di Kòrsou prominente
den baho mundu ta manifestá.
Numeroso kasonan di
asesinato prinsipalmente den
seno familiar, no papia mes di
e atrakonan violento ku arma
di kandela. Famianan ku ta
biba den tenshonnan teribel,
sirkunstansianan sosial
inaseptabel ku yunan ku a
buska nan bida den e negoshi
di droga. Hopi adikshon,
hopi problema di falta di
rèspèt pa propiedat i bida di
hende, armanan di kandela
sofistiká den sirkulashon
i sigui menshoná bai. Un
kultura sumamente agresivo,
violento i di rabia ku a reis bini
ariba, krese bira grandi den e
sirkunstansia di mizeria den
barionan totalmente deteriorá.
Talbes awor sí tin surplus
finansiero riba presupuesto
di gobièrnu, anto por bisa
ku e maneho finansiero
ta bon balansá, pero kiko
a bini a kambio ku den e
realidat di tur dia ta notabel?
Práktikamente kada dia morto
ta kai den seno di famia,
likidashon di miembronan
di bandanan kriminal di
un momento pa otro. Tur
esaki komo konsekuensia
di un komunidat ku a bira
duru, super materialista i
individualista. Na unda tur
e konseheronan di e tempu
ei a keda, mandatarionan
ku a bai di akuerdo pa tuma
medidanan doloroso sin
wak mas aleu, hendenan
ku a pensa ku ta asina
mester aktua??? Ta bai saka
konklushon for di e situashon
aktual, anto sòru pa e
intervenshonnan nesesario
pa atendé ku e sirkunstansia
aktual òf ta laga Kòrsou
sigui bludu bai dominá pa
susesonan teribel kousá pa
atrako i likidashon?

Erwin Raphaëla