Page 6 - AM210412

6 AWEMainta Dialuna, 12 April 2021

Algun cerbes a sali un dama chauffeur

hopi caro, el a perde su auto y a haye

den un gasto basta grandi cu Elmar

CHAUFFEURNAN burachi hopi biaha ta causa
accidentenan cu hopi daño material y te hasta fatal,
y ta trece hopi tristeza den famia. Siendo cu ta
inecesario, laga bo auto para y yama un otro persona
pa dunabo lift of haci servicio di taxi, cu sigur lo
sali bo hopi mas barata, cu ocasiona un accidente.
Menos mal cu e chauffeur burachi a scoge pa hala na

su man drechi y dal contra e pal’i lus y no a hala na
su man robes y dal frontal contra auto di personanan
inocente.

Tabata diasabra anochi pa mas o menos 9’or y 40,
riba e caminda di Tanki Leendert pa Kamerlingh
Onnestraat un poco pabou di e supermercado Sing
Fung, a sosode un accidente den cual lo tabatin
herido. Mesora a manda Polis y ambulance n’e sitio.
Na yegada enberdad nan a bin topa cu e Toyota Yaris
blanco pega contra e pal’i lus, segun testigonan e
chauffeur a trata di reverse e auto pa sigui core, pero
no a logra.

Den e auto tabatin dos dama, e chauffeur cu un
ocupante. E ocupante tabata levemente herida cu
corta na cara.

E chauffeur y e ocupante tabata basta bou influencia,
nan lo a consumi hopi alchol y na un forma hopi
iresponsabel a subi caminda.
N’e sitio nan a bin compronde cu e chauffeur
tabata biniendo di panort bayendo zuid direccion
di Oranjestad y un poco pazuid di Sing Fung
Supermarket pa un of otro motibo a hala na su man
robes y dal basta duro contra e pal’i lus.
Segun testigo, nan a mira un flash basta fuerte, hopi
stof y dje tur lus a paga. E chauffeur mester tabata
biniendo cu velocidad halto, e impacto tabata hopi
fuerte cu un gran parti di Tanki Leendert a keda den
scuridad.

Polis a avisa Elmar, ya cu tabatin wayanan di
coriente colga abou y pa soluciona e problema di
coriente p’e bario por haya su coriente bek, mas
liher posibel.
Ambulance tambe a presenta n’e sitio pa trata e
dama ocupante, pero e dama ocupante pa un of otro
motibo no tabata kier a ricibi asistencia medico.
E dama Chauffeur burachi a keda deteni y na prome
instante no kier a bay den transportwagen. El a
cuminsa yora, pero no a ked’e nada otro cu respeta
ordo di Polis, keda keto, subi den transportwagen, el
a wordo transporta pa Warda di Polis. Takelwagen
a hala e auto for di e sitio, tambe Elmar a presenta
hopi liher y a cuminsa cu e trabounan necesario.