Page 8 - ATA

A4

LOCALDiaranson 19 Augustus

Conseho consultativo ta keda contra ley di Aruba

Ta prefera ley di Reino pa regla CFT
pa Aruba

Den su conseho riba e ultimo version di e concepto di ley CAft, Conseho Consultativo (Raad van
Advies) ta insisti den su oposicion contra escogencia pa introduci un ley di Aruba, mientras cu varios
asunto lo mester ta regla den un ley di Reino. Esaki pasobra e ley local di un banda ta duna facultad
(poder) na instancia pafo di Aruba, manera Conseho di Ministro di Reino y Ministro encarga cu
Asunto di Reino (y Asunto Interior), y di otro banda ta impone responsabilidad y obligacion riba
e entidadnan aki. Conseho Consultativo ta keda di opinion cu no por regla e asuntonan aki asina,
pero cu ta exigi un ley di orden mas halto. No ta por nada den e caso di e otro islanan e asunto di
supervision financiero a keda regla den un ley di Reino.
Esey riba su mes no ta kita e posibilidad pa crea un organo local den un ley local pa supervisa finanza
publico, pero no unda e ta toca entidadnan cu no ta sub ordena na leynan di Aruba. Di tur manera,
ni gobierno di Aruba ni di Hulanda ta parce masha preocupa cu e opinion aki. Pa evita problema di
autoridad pa exigi y haya acceso na e documentonan necesario, e ley ta describi ampliamente e poder
di e colegio pa haya e informacion cu e mester, haciendo imposibel pa autoridadnan di Aruba stroba
CAft pa haci su trabao.
Tambe a keda regla e asunto di acceso na Aruba pa tanto e miembronan di exterior y hasta e posi-
bilidad di ta residencia na Aruba pa e miembronan aki y nan partnernan. Tur ta ‘van rechtswege
toegelaten’ y por traha libremente na Aruba unda nan ta desea. Aparentemente Hulanda no a lubida
ainda e obstaculonan cu autoridadnan na Aruba a causa den pasado pa por ehempel partnernan di
hues of fiscal pa regla nan estadia legal na Aruba y tabata kier a mira esaki bon regla den e ley aki.
E Conseho ta constata tambe cu, pa yega na supervision independiente riba finanza publico, e ley
aki ta solamente un di e instrumentonan cu gobierno tin na su disposicion. E Conseho ta recorda
gobierno cu den su conseho riba presupuesto 2015 a declara caba cu gobierno mester basa su mes riba
diferente pilar: a. medida pa aumenta entrada; b. reforma di sistema di impuesto; c. medida pa baha
gasto; d. independisa of deshaci di tareanan di gobierno; e. reduci debe publico.
E conseho ta mira cu preocupacion cu a pesar di su conseho (y di CFT) pa atende e otro medidanan
aki, por observa cu aparte di algun medida ‘ad hoc’ pa aumenta entrada (aumento den Staten di
BAZV), no ta mira nada ainda di baha gasto, ni di deshaci di tarea di gobierno, mientras cu e refor-
ma fiscal apenas ta den preparacion. Cu otro palabra, e Conseho no ta mira con gobierno lo cumpli
cu e cuadro di gasto y entrada palabra pa 2015, si no ta haciendo nada riba e otro puntonan aki.
Punto di protocol no cumpli ainda
E ley aki no ta atende algun otro aspecto di e protocol di 2 di mei, cu en berdad mester regla di otro
forma. Esaki ta e acuerdo pa trece mas regla y transparencia den maneho di e empresanan estatal y
otro entidad liga na gobernacion. Esaki tumando na cuenta normanan internacional pa ‘corporate
governance’. E aspecto aki tin di haci cu e control financiero tambe. E reglanan pa haya mas trans-
parencia den maneho en general y financiero di e entidadnan ta importante pa por ehempel entrada
cu gobierno ta haya di nan, manera pago di dividend di e empresanan estatal. Esaki sin duda tin di
haber cu e echo cu Hulanda tambe a cuminsa ripara cu e maneho di e empresanan estatal ta fayando.
Por ehempel den sacamento arbitrario di dividend for di empresa, lagando nan sin fondo apropia pa
un bon maneho. Pero tambe e nombramento di persona como fabor politico den gerencia, sin e debido
conocemento pa por funciona. Tur esaki a keda pendiente ainda pero en todo caso den su contesta
riba e conseho di Raad van Advies, Ministro di Husticia a haya su mes obliga pa contesta kico lo por
bay sucede riba e tereno aki. El a referi na e echo cu no tin plan concreto ainda pa legislacion riba
corporate governance en general, pero cu si a tene cuenta cu e aspectonan aki den e leynan pa institui
IMSAN, Serlimar y Aruba Tourism Authority.
Esey no ta kita cu, manera BonDia Aruba a caba di informa den nos edicion di ayera, cu tin hopi
falta di transparencia ainda. Ningun di e entidadnan menciona aki ta publicando nan cuentanan
anual y asina leu cu nos conocemento ta bay, nan no ta obliga via nan mes ley tampoco. Kiermen
tin hopi di mehora ainda den e leynan aki. Lastima cu atrobe ta via Reino ta impone reglanan di
bon gobernacion, pasobra aparentemente nos mes gobernantenan semper ta ‘lubida’ e aspectonan aki.