Page 7 - Solo Di Pueblo

Diarazon 11 November 2015 Pagina 23

Solo di Pueblo

IN MEMORIAM:

Compañero Leo MARCEL SCHARBAAY

Su Pasion pa Sirbi Nos Comunidad y Biba Feliz Cu Un y Tur

Diasabra ultimo mainta tempran nos a ricibi e tristo
noticia cu nos ex-compañero di Leo Club of Aruba y
gran amigo, Marcel Scharbaay a bay laga nos. Algun
siman atras Marcel a cuminsa sinti su curpa malo,
despues di varios siman enfrentando su quebrante di
salud, Papa Dios a dicidi di tume den su reino.

Na aña 1992, ariba invitacion di su amigo y compañero
di school Junior Arends, Marcel Scharbaay a wordo
instala como miembro activo di Leo Club of Aruba,
cual ta patroniza pa Aruba Lions Club, Leo Club ta un
programa di e organizacion mundial di servicio Lions
Club International pa desaroya lidernan hobennan den
comunidad. Marcel a keda activo como miembro te
aña 2000. Durante su temporada como miembro el’a
ocupa varios funcion den e organizacion, Secretario,
Tesorero, Presidente y Director di Area C (Aruba,
Bonaire y Corsou). Ademas durante e aña Leostico
1997-1999, Marcel a asumi e funcion di Tesorero di
tanto di Distrito E-1 y despues Distrito Multiple E, cual
ta consisti di Clubnan Leo di Aruba, Bonaire, Corsou
y Venezuela). Durante su temporada como miembro
Leo el’a ricibi varios reconocimiento pa su excelente
y sobresaliente trabaonan Leoistico desplega entre
nan un di esnan mas halto cual ta “Leo Awards of
Honour”.

Marcel tabata un miembro cumplido y cu pasion pa sirbi su comunidad.
Varios proyecto di Leo Club of Aruba, Marcel a lidera, asisti y/o
contribui. Marcel pa amplia su conocimiento y desaroya su talentonan
di lider, hunto cu demas compañero a asisti na varios reunion y
convencionnan di Clubnan Leoistico y Leonistico den exterior na e.o.
Corsou, Bonaire, Venezuela, Montreal Canada, Philadelphia USA y
Birmingham England. Ademas durante su estudio na Hulanda tambe e
tabata activo den Club Leo aya.

Marcel su cualidadnan como lider semper a resalta, un persona recto,
cumplidor y cu pasion pa sirbi nos comunidad. Un di su donnan ta su
positivismo y sa di hiba un bida sano y alegre, un persona amabel, cu
bon humor, semper cu un sonrisa y na tur momento cla pa duna un
man, un consehero, motivador, un fiel amigo y compañero.

Marcel sigur ta un ehempel pa un y tur, hiba un bida bon pero corda
semper riba esnan mas vulnerabel den nos comunidad.

Compañeronan Leo di 1992 pa 1999, lo keda record’e semper cu su
sonrisa y alegria di tur dia. Fellow Leo Marcel, te dia nos topa bek!