Page 15 - min.jus nov 12,2015

A4
EDITORIALDiahuebs 12 November 2015
Corupcion den duana…
Señal cu mester cuminsa pasa basora den
nos aparato publico?
Pa prome biaha den hopi aña tin un tormenta di
tamaño mayor den nos cuerpo di Aduana. Talbes
desde 1986 nunca tabatin un caso grandi asina, cu
shete miembro suspendi pendiente investigacion di
nan participacion den corupcion hunto cu otronan
den sector empresarial.
Naturalmente tur hende ta inocente te ora keda
proba cu nan a comete delito. E punto di discusion
aki ta con en general ta para cu integridad, o
falta di esaki den nos cuerpo di empleado publico.
Na varios ocasion nos ta tende di caso grandi di
corupcion cu daño financiero grandi pa caha
di gobierno. Nos tabatin e caso grandi di fraude
na laboratorio nacional, den Enseñanza den
transaccion di placa na becado cu despues a resulta
di no ta becado, nos a haya henter e debate tocante
entrada di droga, placa y celular na KIA, cu a
costa dos top ambtenaar nan puesto, pasobra nan
kier a actua contra esaki.
Den e caso specifico di Aduana nos por señala
cierto tendencia cu a tuma luga den ultimo añanan
cu ta parce positivo, pero cu talbes no a resulta
asina. Dos cambio grandi cu a tuma luga den e
cuerpo; uno tabata e separacion entre Servicio
di Impuesto y e cuerpo di Aduana cu a haya un
dirigencia completamente separa.
Esaki a haci cu e nivel superior unda kehonan
riba Aduana tabata drenta no tabata t’ey mas.
Pa hopi aña den Aduana tabata mira e control
di Servicio di Impuesto como un intromision den
nan asuntonan, talbes hustifica, o talbes no.
En todo caso ta interesante pa sa si e nivel di control dirigencia den e departamentonan tin un debido
ey a haya su debido sucesor dentro di e cuerpo
mes. Por ta cu den e caso aki e control interno a
funciona bon, talbes no. Di loke nos a comprende
di comentario den prensa te awor ta parce cu ta
externamente a cuminsa ripara cu algo no tabata
andando bon den e cuerpo aki. Cu tempo nos lo por
haya sa con esaki a bay en realidad.
E otro topico importante tabata e introduccion di
e sistema digital ASYCUDA di cual por cierto a
tende hopi comentario positivo di parti di sector
comercial como cu e ta facilita e comunicacion
entre empresario y e instancia oficial aki, haciendo
tur hende nan bida mas facil.
Di otro banda a tende tambe di conocedonan di e
sistema digital cu e tin como desbentaha cu e no
brinda bon facilidad pa ‘track’ cada transaccion
den e sistema y cual usuario lo ta responsabel pa
e transaccion specifico ey. Di tur manera, ta parce
importante pa averigua si e departamento den
su setup nobo por conta cu un sistema adecua di
control interno.
Na nivel mas general, mester ta consciente cu
den henter e aparato gubernamental tin hopi
actividad ta tumando luga den banda cu ta crea
un tipo di “grijs gebied” entre loke por y no por
den e aparato publico mes, cu ta haci dificil pa
evalua si ta trata di corupcion si of no. Kico pensa
di e empleado publico cu ta yuda cliente pa nan
yega unda nan mester yega cu e peticion cu nan ta
dirigi na gobernacion pa por ehemplo permiso? Te
unda ta yuda e ciudadano na un manera corecto,
y ta duna balor agrega na e funcionamento di e
departamento?
Y unda e ta bira un acto di corupcion? Nos tin por
ehemplo e empleado publico cu ta traha na DOW
y ta pinta mapa pa persona priva den nan tempo
liber. Permisibel? Nan mag cobra pa esey? Y ora e
mapanan cu nan pinta yega oficina, nan ta keda
trata cu prioridad? Tin dunamento di privilegio
den esaki? Ta trata aki talbes di competencia des
leal contra persona cu ta opera un negoshi cu ta
duna e mesun servicio den sector priva? Ta posibel
cu e empleadonan publico aki ta haci uzo di
infrastructura di gobierno pa gana placa banda di
nan salario?
Hopi pregunta cu ta rekeri un contesta, sin cu
necesariamente ta acusa ningun hende di ta comete
acto coruptivo. Ta bay pa e pregunta si na nivel di
control riba e cosnan aki.
Ta bira tempo pa cuminsa pone cosnan na nan
luga den e aparato publico. Y esey na prome luga
ta concerni e revision riguroso di tur trayecto di
peticion y e trayectonan cu ta concerni maneho
financiero. E actual mandatario di Financia tin
e oportunidad unico pa proba su profesionalismo
y e echo cu e no ta un politico di pura sepa cu
ta depende di popularidad den eleccion pa pone
gobernacion ‘on track’ cu un sistema adecua di
control financiero den henter e aparato. Cu e lo
cuminsa den esunnan cu ta cay directamente bao
di su responsabilidad ta logico, pero ohala cu e no
dal para eynan.
Esaki ta un di e asuntonan cu no tin nada di haci
cu politica partidario pero ta asunto di interes
nacional, y si e ministro aki logra haci “schoon
schip” e mester por conta cu aprecio di tur.q