Page 7 - bon-dia-aruba-20211220

a7
local Dialuna 20 December 2021

“Ta trata di un lugar special”

Comandante di Marinierskazerne kier sinta na mesa tocante tuberia di gas

Comandante di Marinierskazerne Aruba no tabata
informa di e plannan con ta hiba e gas natural di RDA
pa WEB. Asina Comandante Art van Beekhuizen a bisa
Bon Dia Aruba.

Ainda ta keda hopi interogatorio riba con ta bay core e tubonan
di gas di tereno di RDA pa WEB. Manera ta e realidad, ni
WEB, ni Eagle LNG ta duna mucho informacion. Sean Lalani
di Eagle LNG a bisa Bon Dia Aruba cu ta bay usa e mesun
sistema di infrastructura cu tin awor aki, pero cu tubonan
nobo.

Sinembargo, e sistema di tubo actual ta pasa den areanan
residencial, particularmente na Savaneta y Pos Chikito.
Pero tambe den Marinierskazerne na Savaneta. Segun e
Comandante, na momento cu yega asina leu cu ta determina
cu ta usa e mesun trayecto di e tubonan, e lo kier sinta na mesa
pa haya sa mas, y duna su punto di bista. “Marinierskazerne
Savaneta tin explosivo,” el a comenta. “Como tal ta un lugar
special (“een plek van bijzonderheid”).

Pero hopi area unda e tubonan lo pasa tambe ta special.” Mas
Comandante van Beekhuizen no kier a bisa riba e topico.
Locual si el a agrega ta cu na Juni 2020, a informa WEB cu e
tubonan cu ta pasa riba e tereno, of por lo menos nan fundeshi,
ta den mal estado. WEB a keda di bin controla, pero esey no
a sucede ainda.

Bon Dia Aruba a tuma contacto cu DTI pa mira si ta berdad
cu ya caba a aproba e plannan infrastructural pa e tubonan di
gas, pero apesar di a laga e pregunta specifico atras, no a haya
reaccion di parti di Director di DTI.
Personanan cu conocemento a bisa dificilmente lo por pasa
e tubonan bao tera banda di lama pazuid, pasobra e efecto di
salo riba e tubo lo ta un problema, a menos cu construi un
tunnel pa pasa e tubonan aden . Esey tabata probablemente e
motibo cu tempo cu a construi e sistema di tubonan a dicidi
pa pone nan riba tera.
GasUnie tabatin plan pa pone tubonan dos meter bao tera,
pero e costo tabata mucho halto. Consecuentemente, a traha
e plan pa instala e tanki na Barcadera y core e tuberia for di
Barcadera pa WEB, cu ta un distancia di 1.2 kilometer, leu for
di areanan residencial. Bon Dia Aruba a logra haya potret di e
plan di GasUnie.
Marinierskazerne Savaneta ta un Kazerne di Cuerpo di
Mariniers di Hulanda y ta parti di e Comando di Forzanan
Naval, y ta cay bao autoridad di Comandante di Forza Naval
den Caribe, cu su sede na Corsou.