Page 4 - HOH FEB 17 2022_Neat

700 dia den Covid a kousa un promedio di 20 pashènt pa dia den CMC (sifra kompilá for di
òktober 2020 te ku febrüari 15 2022). E sifra aki ta demandá por lo ménos 7000 anochi di
Covid pa 2022, saliendo for di punto di bista ku lo no bai tin restrikshon i medida. Gobièrnu
i SVB ta bon na altura kuantu un anochi di Covid ta kostando Kòrsou. Segun nos kálkulonan,
por lo ménos 4000 florin. (10400 anochi prekalkula na un kosto di 31.8 mion SVB mas 13
mion di CMC). E sifranan aki ta sufisiente pa dirigí gobièrnu na un maneho struktural pa
Covid. E solushon ta simplemente ataka e oumento marginal den kostonan médiko debí na
Covid, riba dos trayekto: 1. Reforma Trayekto di Kuido inkluso Covid (Vigilante ta bin bek
riba e argumentashon aki). 2. Reformashon Fondonan Sosial i Banko di Seguro.

E artíkulo ke reflehá ku naturalmente e 914 mion florin ku Kòrsou a gasta durante 2020 pa
2021, no mester a bai na Kuido Médiko so, sino e efektonan riba ekonomia i desempleo
tabata un desaster. Di otro banda, no ta rashonalmente responsabel pa habri frontera pa
Covid sin konsiderá e sektornan den Kuido Médiko i nan gastunan adishonal. Mester bai
tene kuenta ku oumento di pago na dòkternan di kas, botika, laboratorio, institutonan di
kuido (hospitalnan) i kasnan di kuido. Tur kos lo dependé di kuantu sèn gobièrnu tin pa
oumentá e Presupuesto di Kuido durante 2022. Sehos, ántes tabata risibi 135 mion for di e
Presupuesto di Kuido. CMC ta risibiendo 200 pa 205 mion florin lokual no ta sufisiente.
Segun nos kálkulonan, pa CMC so lo tin mester di por lo ménos 30 mion florin adishonal,
4000 florin biaha 365 dia biaha 20 pashènt pa dia promedio. Esaki ta kasi igual na lokual
SVB a paga pa kuido di Covid te ainda. Riba e suma aki mester anadi e gastunan èkstra den
demas sektor médiko, ya menshoná.