Page 6 - HOH FEB 17 2022_Neat

PUNDA- Mientras ku gobièrnunan rònt mundu ta anunsiando trayektonan pa
eliminá e medidanan ku a keda implementá kontra Covid-19, ekspertonan médiko ta
di opinion ku aun nos no a yega e punto ku por biba sin ningun medida.

Manera ya ta konosí mayoria pais na mundu ta den e trayekto pa eliminá medidanan ku a
keda implementá kontra Covid-19. Motibu prinsipal pa esaki ta debí na un tasa haltu di
bakunashon i na karakterístikanan di e último variantenan, no tin indikashon mas pa keda
biba den un estadio di emergensia. Outoridatnan na paisnan oropeo ya a informá ku mester
kuminsá trata e vírus di Covid-19 manera ta hasi ku kualke otro vírus endémiko manera
por ehèmpel grip.

Durante último rueda di prensa ku a tuma lugá na Hulanda, gobièrnu a informá ku pa fin di
febrüari gran mayoria si no ta tur medida, lo keda eliminá, inkluyendo e medidanan básiko
manera distansia sosial i uso di tapaboka.

Sinembargo, virólogo na Hulanda, Marion Koopmans, a atvertí ku aun Hulanda no ta for di
peliger pa loke ta trata Covid-19 i ku aun mester keda anda ku prekoushon. Segun
Koopmans, e situashon di e vírus di SARS-CoV-2 no ta na un punto ku ta hustifiká
eliminashon total di tur medida. Koopmans ta di opinion ku medidanan manera traha for di
kas i uso di tapaboka mester keda enkurashá, spesialmente mirando ku aun tin
relativamente hopi hospitalisashon i e poblashon hulandes tin basta persona vulnerabel.
Ademas, e virólogo ta añadí ku si eliminá tur medida awor, i despues bini un variante ku
mester re-introdusí e medidanan atrobe esaki lo ta difísil den e poblashon na Hulanda.

Mirando e opinion di ekspertonan médiko rònt mundu i Organisashon Mundial di Salú
(WHO), ta mustra komo sifuera outoridatnan lokal ta muchu purá pa eliminá e estado di
emergensia ku a keda implementá for di komienso di e pandemia. Ekspertonan ta keda usa
e argumento ku aun no por bisa ki trayekto e vírus lo kana sigur. Ademas, aun no tin
solushon pa e grupo di personanan vulnerabel den poblashonnan kual ta pone un preshon
inmenso riba kuido médiko na momentu ku un variante nobo plama den un pais.

Eksperto riba kuido intensivo na Hulanda, Diederick Gommers, a duna di konosé ku ta bon
pa relahá algun medida pero si eliminá muchu medida pareu e grupo vulnerabel ku no por
bakuná òf kaminda bakunashon tòg no ta protehá sufisiente no tin puesto mas den
sosiedat. Konsekuensia di esaki ta ku e grupito aki lo keda será i isolá pa asina no sufri di e
konsekuensianan severo ku por bini despues di infekshon ku e vírus.

Mientras no tin un solushon permanente i duradero, no por eliminá tur medida. Koopmans
a duna di konosé ku ta krusial pa veriguá kon pa dil ku variantenan ku lo presentá den
futuro. Mester trata di implementá un maneho efektivo mundialmente pa por anda ku
posibel brotenan den futuro sin esaki afektá henter e funshonalidat di un pais.

#Virólogo Marion Koopmans