Page 10 - DESPA 19 JUNE 2017

PROME MINISTER TA FELICITA TUR

SECTOR DI CUIDO MEDICO CU NAN DI 100

ANIVERSARIO

18/06/2017 Admin Uncategorized Leave a comment

“Un fuerte aplauso pa cada un cu ta haci un diferencia den nos salud”

ORANJESTAD – Prome Minister Mike Eman a hiba palabra diabierna mainta
durante ceremonia cu Departamento di Salud Publico a tene pa celebra su di 100
aniversario. Palabranan di Premier Eman tabata enfoca riba gratitud pa e labor
valioso cu profesionalnan den cuido medico ta desempeña den comunidad, con e
ta hancra den e balornan di nos pueblo Arubiano manera dedicacion y amor pa
prohimo. “Un palabra di gratitud pa e trabou cu boso ta desplega tur dia,” Prome
Minister a bisa.

Na opinion di Prome Minister salud ta e esencia di nos bida cu hopi bes nos ta
tuma como algo normal te na momento cu nos tin un kebrante di salud. Ni
cuanto placa un persona tin na momento cu e tin un kebrante di salud, e ta
dispuesto pa duna tur cos pa e haya e salud aki bek, “y esey ta bisa hopi di e
trabou cu boso tur ta haci pa garantisa salud di nos hendenan.”

Na momento cu tin un hende cu kebrante di salud den nos famia of un persona
cerca, nos tur ta sinti un inkietud, nos tur ta sinti un preocupacion. Esnan cu tin
e capacidad pa yuda mehora nos salud ta sinti e responsabilidad pa sanea y
trece bek e salud di e persona aki pa e por tin e calidad di bida cu nos kier pa
nos prohimo. Esaki ta e esencia di nos relacion manera nos Creador a pone nos
riba e mundo aki, pa ta servicial, pa ta den un convivencia continuamente un pa
cu otro.

“E amor, e convivencia, e sentido di responsabilidad cu nos tin pa nos ruman, pa
nos famia, pa nos amistadnan nunca mag di cambia,” Prome Minister a comenta
indicando tambe cu e trayectoria di ultimo 100 aña ta un testimonio riba su mes,
pero tambe un compromiso pa su continuidad. “Laga semper esaki ta un di e
virtud y balornan di nos tur, uno pa cu otro. Salud finalmente ta loke ta laga nos
tur ta personanan alegre, contento den e capacidad pa haci e maximo pa nos
bida,” Minister President Eman a finalisa bisando.