Page 4 - AHATA

8 LOCAL AWEMainta
Orange Economy ta florece a base di
proceso y no solamente resultado
HOPI biaha na Aruba nos ta warda te ora algo ta “cla” prome cu nos aplaudi’e.
Un festival di musica ta conta solamente si e yega den noticia internacional.
Un artista ta valido solamente ora e bende den exterior. E obsesion aki cu
resultado ta ciega nos pa e berdadero fundeshi di crecemento: Progreso.
Den Orange Economy—e sector creativo di arte, cultura, diseño, y inno-
vacion—progreso no ta un detaye secundario. E ta e economia mes. Cada
ensayo, cada sketch, cada tayer, cada experimento ta loke ta mantene e
sector aki na bida. Pero ainda nos sociedad ta comporta como si fuera balor
ta existi solamente na e liña final. E mentalidad ey ta stroba nos di avansa.
E realidad creativo
Puntra cualkier artista of musico: Exito nunca ta un solo evento. E ta resul-
tado di un sinfin di fracaso, intento, y ‘mitar-victoria’ cu no ta yega den noticia.
E mural na San Nicolas cu e turistanan ta gusta? E no a aparece di anochi
Diabierna, 22 Augustus 2025
pa mainta. El a nace for di simannan di sketch,
revisa, verf, coregi, y lucha contra frustracion. E
progreso ey tabata invisibel—pero sin dje, lo no
tabatin un muraya cla.
Si Aruba ta celebra solamente e momento
final, nos ta manda e mensahe robes na nos
creativonan: boso esfuerso no ta conta te ora e
ta “perfecto.” Esey no solamente ta inhusto—e
ta destructivo. E ta descurasha talento hoben, e
ta sofoca experimentacion, y e ta reduci creativ-
idad na un loteria di producto final en bes di un
proceso bibo y vibrante.
Progreso ta balor
Nos mester cuminsa reconoce progreso mes
como un forma di balor. Un klas yen di mucha
siñando musica, maske nan nunca toca den un
orkesta, ta balor. Un cineasta filmando su prome
clip cortico cu amigo, ta balor. Un artesano cu
ta mantene ofishi tradicional na bida, aunke su
bentanan ta modesto, ta balor.
E pasonan aki por ta no ta parce milager
economico awe, pero nan ta e tera fertil den
cual e futuro industrianan creativo di Aruba lo
crece. Ignora nan, y nunca nos lo tin raiznan
suficientemente fuerte pa sostene un Orange
Economy.
E les pa Aruba
Laga nos ta cla: Orange Economy no ta un
atraccion turistico ni un sector di hobby. E ta
un oportunidad economico serio. Pero e lo cay
den otro si nos enfoca solamente riba resultado
final. Ningun refineria no ta wordo construi sin
añanan di planificacion, ingenieria, y prepara-
cion. Ningun hotel no ta habri sin cu cientos di
trahado pone bloki riba bloki. Pero ora ta trata
di creatividad, nos kier resultado instantaneo.
E midimento cu dos midi ey ta strangulando
potencial.
Si Aruba di berdad kier tuma un rol di lider
den Orange Economy, nos mester cambia nos
manera di pensa. Esey ta nifica no solamente
aplaudi e eventonan grandi y exitoso, pero
tambe e exposicionnan chikito cu hopi biaha ta
marca e comienso di algo mas grandi. E ta nifica
inverti den training y tayer, en bes di dirigi tur
nos recursonan na show’nan riba escala grandi.
Y e ta nifica apoya nos talentonan creativo
desde e puro comienso di nan trayectoria, y no
solamente ora nan ta considera “exitoso” caba.