Page 68 - MIN TTC 21 OCT 2015

Un total di 77 peticion a drenta pa bende klapchi e aña aki
Publication: Wednesday, 21 October 2015. Categoria: General
Ayera tabata ultimo dia pa pidi permiso di benta
Prome dia di benta lo ta diadomingo 27 di december 2015

ORANJESTAD(AAN)–: Un di e tradicionnan pa hopi aña na Aruba, ta tiramento di klapchi
durante cambio di aña. Anualmente bendedonan y rebendedonan ta acudi for di trempan pa pidi
permiso pa bende klapchi. Aña pasa a drenta 80 peticion mientras cu e aña aki 77 hende a haci
tal peticion.
Pa garantisa cu bendedonan y publico ta sigui reglanan stipula dor di Gobierno, a instala un
comision forma pa Cuerpo Policial Aruba, Dienst Technische Inspectie (DTI), Cuerpo di
Bombero y departamento di Salubridad Publico, pa hunto controla, supervisa y duna e guia
necesario pa sigura cu ta mantene normanan di siguridad halto na sitionan di benta. Tur esaki den
un esfuerso pa preveni accidente innecesario.
Otro siman lo tuma luga un reunion cu e importadonan di klapchi, pa repasa tur e reglanan
stipula rond di importacion, transportacion, almacenahe, benta y despues con y unda ta warda e
klapchinan cu resta. E reglanan ta hopi estricto, pero ta pa evita desgracia, of manera a nota e
ultimo añanan, desaster den areanan habita pa motibo di klapchi.
Un di e medidanan conoci cu e comision ta aplica asina cu nota fayo den mantencion di e
reglanan, ta pa “trek in” e permiso otorga di benta. Cu esey mesora Polis ta tuma tur e cargacion
den beslag y e rebendedo ta hay’e ta cera su tienda mesora. E no ta un medida cu lo tuma facil,
pero e ultimo añanan el a sosode na algun ocasion. Hopi bes sa duna chens pa corigi e fayonan,
pero si no cumpli of no por cumpli, ta bay over e ora na cera e negoshi.
Di acuerdo cu peticionnan cu a drenta, pa cambio di aña 2015 pa 2016, lo importa no menos di
22 container di klapchi. E prome dia di benta lo ta diadomingo dia 27 di december 2015.

http://www.diario.aw/2015/10/un-total-di-77-peticion-a-drenta-pa-bende-klapchi-e-ana-aki/