Page 69 - MIN TTC 21 OCT 2015

Usuarionan vast di Arubus ta bolbe reacciona tocante calidad di e busnan mas
nobo!

Publication: Wednesday, 21 October 2015. Categoria: General

ORANJESTAD (AAN) – “Nos ta simple pasahero vast di Arubus cu tin keho tocante e calidad
di busnan cu ta transporta nos tur dia, y tin nada di haber cu color politico ni politikeria”, ta
palabranan di un trahador di hotel cu ta pasahero vast di transporte publico, y mas tanto Arubus.

E ta un di e pasaheronan cu a reacciona riba e posicion cu minister di transporte ta asumiendo
tocante e servicio di Arubus, specificamente e busnan cu ta tur dia riba caminda hibando y
treciendo hende riba diferente ruta.

Segun opinion publico, cu bon por ta cu e minister nunca a subi core den un di e busnan blauw
relativamente nobo. E no a pasa den e susto cu e pasaheronan sinta den bus si ta pasa cada bez cu
e chofer tin cu hala brake pa para pa subi of baha pasahero.

Tur hende ta sclama den e bus tur spanta! Aworaki berdad a drecha airco di algun di e busnan
aki, pero mayoria di esnan cu e minister a introduci poco aña pasa, a core sin airco pa mas cu tres
luna largo! E minister por puntra e chofernan mes, nan no tin nodi gaña!

Stoel di varios di e busnan ta kibra. Ora bo sinta si bo ta un hende muher bo paña ta keda pega
meymey di e asiento kibra y ta daña y esaki no ta un asunto desconoci pa e mesun chofernan.
Asina tin pasahero ta conta nos.

Contrario na loke e minister ta pensa, e busnan prome ta esnan cu a wanta duro pa tempo masha
largo mes! Ainda nan ta riba caminda. Si nan ta daña awor ta logico, nan tin hopi aña bieu y
ainda ta sigui traha.

Pa ultimo, un persona cu tabata den un di e busnan cu a pega na candela tin un pregunta, y esey
ta cu si minister lo ta na altura of no sa mes, cu e dos busnan cu a pega candela un poco siman
atras ta net dos di esnan cu a drenta ultimo den e flota di Arubus?

E pasaheronan cu a reacciona ta spera cu minister no tuma esaki como issue politico pasobra
esey no ta e caso. Sigur cu no. Esaki ta e voz di hende cu tur ora bay mainta, atardi, y anochi ta
uza Arubus mas tanto pa transporta nan mes di cas pa trabao y di trabao pa cas entre otro.

http://www.diario.aw/2015/10/usuarionan-vast-di-arubus-ta-bolbe-reacciona-tocante-calidad-di-e-
busnan-mas-nobo/