Page 8 - Awemainta

8 AWEMainta Diamars, 23 Februari 2016

DESPA, GKMB, Serlimar, City Inspector y DOW trahando hunto

A cuminsa un accion di “swipe”
di punta pa punta di nos isla

Den un esfuerso pa elimina criaderonan di sangura

“TA IMPORTANTE pa nos ricibi cooperacion di

pueblo den e esfuerso aki cu nos ta realisando. Sin e
sosten di comunidad, ta casi imposibel pa nos combati
y elimina e sangura cu ta plama Dengue, Chicungunya
y Zika”, asina Minister dr. Alex Schwengle a duna di
conoce.

Den fin di siman un cantidad di departamentonan di
Gobierno, manera ta Departamento di Salud Publico,
Gele Koorts en Muskieten Bestrijding, Serlimar,
City Inspector y DOW a uni esfuersonan pa cuminsa
un “swipe actie” for di punta pa punta di nos isla.
A cuminsa na Noord cu intencion di termina den
algun siman na e siguiente punta di nos isla, esta San
Nicolas.

Nan trabou primordial ta pa bishita tur cas, check pa
criaderonan, elimina esunnan existente y preveni pa
tin criadero dor di tene e luga limpi, bay cu autonan
bieu bandona, artefactonan electronico benta den
mondi y asina por sigui menciona. DOW a pone como
9 trahado disponibel cu ta sirbi como sosten adicional
na e ekipo existente caba di inspectornan di GKMB.

Den fin di siman Minister dr. Alex Schwengle a bay
topa e grupo cu apenas a cuminsa cu nan trabounan
den e districto di Noord. E mandatario a keda
sorprendi di mira cuanto criadero di sangura por tin
den un area asina chikito. Tur cup bashi, foambox
di cuminda benta den mondi, tur ta bira un criadero
asina cu poco awasero yobe riba nos isla.

Jerry Staring di Departamento di Salud Publico a
subraya cu sin criadero no tin sangura y sin sangura lo
no tin ni Dengue, ni Chicungunya y ni tampoco Zika.
E ta masha contento cu e sosten cu ta ricibiendo di e
departamentonan di Gobierno cu a uni pa e accion aki.