Page 7 - Awemainta

AWEMainta Diamars, 23 Februari 2016 7

Minister Benny Sevinger:
Despues di a construi mini veld di futbol na Bushiri
y un compleho di recreacion na Madiki,

Nos ta sigui pa Cura
Cabai, Bubali y Dakota

DESPUES di a realisa e apertura di mini cancha di futbol y parke na Madiki

y anuncia cu pronto lo cuminsa construi acera y verkeerdrempels den e bario,
p’e titular di Infrastructura ta importante pa tur hende sa cu e trabou no a
caba aki.
Den su palabranan n’e ceremonia di diahuebs ultimo, Minister Benny Sevinger
a bisa cu Gabinete Mike Eman II ta continua trece facilidadnan di recreacion
na otro skina di Aruba y e siguiente proyectonan di mini veldnan lo ta na Cura
Cabai, Bubali y tambe Dakota.

“Esaki ta importante p’e desaroyo di bario,” e mandatario a bisa. “Nos ta traha
hunto cu e barionan pa trece solucion.”

Ademas di Minister Benny Sevinger, coleganan di
Husticia y Salud tabata presente. Ministernan Dowers
y Schwengle a papia di e trabou den ekipo cu ta tuma
lugar den Conseho di Minister ora cu Prome Minister
Mike Eman ta trece e iniciativanan aki pa dilanti.
Ideanan manera di e mini cancha di futbol ta haya
sosten di Ministerio pa loke ta trata trabounan publico,
facilidadnan di deporte, finanza y tambe siguridad.

“Sin duda e proyecto aki lo mehora e calidad di bida
di e bario. Ademas di Polis den Bario muchanan lo
ta menos riba caya y mas riba veld haciendo cosnan
saludabel,” asina Minister Sevinger a declara.
Tabata particularmente un momento special mirando
cu e ceremonia di apertura a conta cu presencia di
algun di e grandinan di futbol cu na organisacionnan
manera Riverplate, Aruba Juniors y RCA.
Na opinion di e Minister, e hendenan aki a duna nan
contribucion pa generacionnan por a haci deporte y ta
spera cu por tin mas ciudadano asina cu ta contribui
na nos bario y na nos pais.

Adicionalmente Minister Sevinger a felicita Premier
Mike Eman pa su empeño den ehecuta proyectonan
den bario cu ayudo di INFRA-Team, FCCA y su propio
Ministerio, entre otro. Tambe tabatin un palabra di
pabien pa contratista p’e excelente trabou haci.
“Tur esnan envolvi a haci un bon trabou. Mas nos
traha, mas nos hobennan ta bay haci uzo di dje; mas
nos ta bay contribui na siguridad, na deporte y na un
mihor sociedad sano pa nos pais,” asina Minister Benny
Sevinger a finalisa bisando, pero na mesun momento
pidiendo un y tur den bario pa haci bon uzo di e veld
aki, cuid’e ya cu e ta un inversion di nan propio placa
y a wordo haci cu hopi sodo.
Su deseo ta di por mira hobennan di tur edad haci uzo
di dje y grandinan tambe bin sinta combersa, wak e
bida rond di dje y trece ambiente n’e facilidad.