Page 10 - ASTEC

Accion di trahadonan di ASTEC a

continua na waf awe

Posted on 01/15/2015 10:20 am AST | Updated on 01/15/2015 10:23 am AST

ORANJESTAD – E accion di e total di 50 trahadonan di e compania ASTEC a
continua awe mainta y asina ta drenta su di dos dia. Esaki mientras cu e gerencia di
e compania ta preparando pa hiba e trahadonan Corte pa forza nan bay traha bek.
“Esaki ta loke nos tabata warda” e presidente di e sindicato Union Portuario di
Aruba, Dave Franken a bisa NoticiaCla.com awe mainta. E la confirma cu nan ta
determina pa keda pafo ‘te ora cu nos wordo yama paden pa un reunion, of nan
hiba nos Corte”. E reaccion di parti di ASTEC tabata cu ‘no ta duna comentario,
sino te despues di e caso legal’. Y esaki tabata e caso tambe di ASTEC pa cu su
trahadonan. “Nada. Ningun reaccion di gerencia” tabata contesta di Franken. E
compania ta encarga cu carga y descarga carga di bapornan cu drenta waf.

E accion, -cu a cuminsa diaranson-, ta un culminacion di intento di e trahadonan y nan
sindicato UPA durante e ultimo 6 luna pa haya otro riba e contracto colectivo nobo. Esun
bieu mientrastanto a vence na fin di aña. “Mediado a intermedia y tampoco (no a duna
resultado). E accion segun Franken, ta pa e trahadonan haya chens di mustra gerencia nan
disgusto cu no a paga e asina yama ‘bashi geld’ completo y tambe a menasa di baha e
aumento te na 60 florin pa luna. Asina nan ta ‘gewoon impone’ cu nan ta bahe na 60
florin. “Nos a bisa e ora cu ta basta!”.

E effecto cu e accion tin riba e waf tey segun Franken. “E lo tin hopi efecto. Unabes nos
pone trabou abou, economia di Aruba ta sacudi un tiki”. Segun e presidente di e
sindicato, tin dos barco cu lo bay sinti e consecuencia mesora. “Awor tin un barco di auto
cu practicamente no ta drey mes of ta drey slow. Mas atardi tin un barco di container cu
ta trece berdura cu fruta. Esaki tampoco nos ta bay traha. Pues e efecto ta grandi”.
Director di Aruba Ports Authority, Jossy Figaroa no kier a duna ningun reaccion awe
mainta ainda.