Page 43 - EXTRA

Djaweps 1 Febrüari 2018 43

(pa Ruud Janknegt)
Influensianan di klima
riba hortikultura na Kòrsou
...Kourou tin un klima difísil pa ehersé agri- i
hortikultura. Nos tin un klima semi árido. Arido ke men
seku. Tòg e kantidat di awa no ta desepshonante. Pa aña
nos ta haña mas o ménos 550ml. miéntras ku Ulanda
700ml. ta kai pa aña. E diferensia ta ku nos awa ta kai
den un tempu kòrtiku di 3 luna, i na Ulanda e ta dividí
durante henter aña. Ademas aki ta hopi mas kayente
den temporada ku awa no ta kai. Tambe e awa ta kai den
yobida kòrtiku i e ta evaporá masha lihé. Mester tene
kuenta ku e suela ta poroso komo e ta konsistí di kalki i
diabas. E kalki ta hasi ku e suela ta poroso di forma ku
e mineralnan den e greis no ta haña chèns pa disolvé.
Ku frekuensia nos ta tende ku promé nan ayá awa
tabata kai muchu mas ku awor, pero den un gráfika
a traha na SOLTUNA ta sali na kla ku ántes tambe
tabatin aña seku i di hopi awa. Mira e grafik, Asina ta ku
hortikultura mester tuma lugá den lunanan di òktober,
novèmber i desèmber si bo ta dependé di áwaseru. Ta
yama lunanan di mei yüni i yüli ‘tempu chikí di áwaseru’
pero no ta kos ku hortikultor por konta kuné. Ta sigui e
interpretashon di e promedio di yobida den mm: yanüari
37, febrüari 22, mart 12, aprel 17, mei 40, yüni 47, yüli
49, ougùstùs 61, sèptèmber 79 òktober 76, novèmber
91, desèmber 89.
Hopi mata mester di nochinan mas fresku pa nan saka
flor, por ehèmpel na Venezuela tin seru ku konsekuensia
ku anochi e temperaturanan kantu di e serunan ta vários
grado mas abou. Ta yama e mata i frutanan ku mester di
esaki mata di mediteráneo, manera p.e. awakati. Tomati
no ta krese den lunanan di yüni, yüli i ougùstùs ora
ku temperatura mediano ta 33 grado Celsius. Ademas
nos tin un pasat nortost di hopi forsa frekuentemente.
Pa nos hendenan e bientu ei ta agradabel, pero pa e
klima fuerte aki ta nifiká ku hopi nubia di áwaseru ta
supla bai zùitwèst den direkshon di Venezuela. Aya
nan ta kontra e montañanan i komo konsekuensia tin
yobida. Aunke nos serunan ta masha abou nos tin mas
seru den Bándabou (Christoffel) ku konsekuensia ku e
promedio di awa ta kai na Bándabou ta mas ku ta kai
na Bándariba. Pa taha bientu den lugánan kaminda ta
ehersé hortikultura sa planta un tranké/ kareda di mata
di eukalipto.
Denter henter aña tin mas o ménos 8 ora di solo
pa dia. E kultivadónan di e plantashon resien di drùif
pa traha biña ta un poko preokupá pa e echo ei. Den
e paisnan klásiko ku ta kultivo biña manera Fransia,
Italia, Spaña den verano tin mas ku 10 ora di solo pa
dia. Ke men nan mester skohe nan espesie di mata ku
kuidou buskando esnan ku por bona ku ménos solo i
temperatura haltu.
Pa saka afó kua ta e berdura i frutanan ku por adaptá
mihó na nos klima semi-árido SOLTUNA a hasi diferente
investigashon ku algun berdura.
Por ehèmpel resien a tèst 7 sorto di blumkol diferente,
di lo kual 2 a duna un resultado basta satisfaktorio. Un
di e kultivadónan a dediká na kultivá blumkol, pero e
no tabata bende bon pasobra blumkol importá tabata
mas grandi.
Pa resumí, bon konosementu di nos klima variabel ta
rekerí adaptashon di e materia òf aplikashon moderno
di sea kas di sombra òf di glas.
Den e rubriká Skina di Agrikultura nos lo sigui
informá bo mensualmente tokante e desaroyonan nobo
riba tereno di agri i hortikultura.

Pa kualke pregunta por mail na redactie@extra.cw
Outor di e rúbrika aki Ruud Janknegt ta forma parti
di e direktiva di Soltuna. E miembronan di direktiva ta
haña ku mester hasi mas konosí e situashon lokal di
agrikultura. Den e rúbrika Skina di Agrikultura ku lo sali
kada pasa siman, e direktiva lo duna informashon riba
desaroyonan nobo di agrikultura na Kòrsou.