Page 7 - ARUBA BANK 29 OCT 2015

Orador di Annual Corporate Event di ATIA ta bay presenta
topiconan actual y relevante pa comercio

Publication: Thursday, 29 October 2015. Categoria: General

ORANJESTAD (AAN): E aña aki ATIA ta cumpli 70 aña
di existencia y un biaha mas nan ta bay tene nan evento annual cu ta e ‘Annual Corporate Event’.
E evento ta bay tuma lugar riba dia 27 di November na Aruba Marriott Resort y e tema ta bay ta
‘Labor Market Flexibility’.
En conexion cu e di 70 aniversario di ATIA, ta preparando un tremendo evento pa tur miembro y
henter comunidad di Aruba.
E meta di e evento ta pa recauda fondo pa ATIA, pero tambe pa trece hunto e comunidad
comercial di Aruba, unda cu un orador invita lo presenta un topico actual y relevante pa
comercio, durante un anochi social y dinamico, caminda cu lo tin e oportunidad pa network.
Esaki segun señora Kimberly Boekhoudt di ATIA, kende a bisa tambe cu riba e anochi ta bay tin
entretenimento, unda cu tur hende por balia.
E enfoke di e aña aki ta riba flexibilidad di nos mercado laboral, mientras cu bo ta wak cu
actualmente e cambio den nos ley laboral a causa un debate cu ta tumando lugar den nos
comunidad.
“Nos ta sigur cu esaki ta e momento indica pa trece un orador cu experiencia y conocimento riba
e topico aki”.
“E orador ta señora Ronnie Goldberg, kende ta vice presidente regional di International
Organization of Employers na Merca y ta un persona conoci y activo internacionalmente”.
Esaki segun señora Boekhoudt, kende a sigui bisa cu señora Goldberg ta consehero di e
presidente y director ehecutivo di United States Council for International Business y ta
representa negoshinan Mericano den varios forum di nivel halto.