Page 8 - BNDIA ARUBA

Diahuebs 7 December 2017 LOCAL
A8

Poetanan na Poetry Showcase a declama tambe tocante

Roshandrick y Eugene

ORANJESTAD- Ayera anochi a tuma luga e Poetry Showcase na Biblioteca Nacional.
E showcase tabata special pa poetanan nobo cu a presenta dilanti un audiencia pa
prome biaha despues di a tuma e workshop pa skirbi poesia duna pa Lily Clarisa
Henriquez. Un gran parti di e poetanan cu a declama a presenta poemanan relaciona
cu deramento y caso di Roshandrick y Eugene (Roshandrick).
E anochi a mira como claro e prome presentacionnan di poetanan cu a ‘nace’ pa prome biaha cu
e evento aki den un momento special den cua e participantenan di sra. Henriquez su workshop
a trece dilanti nan emocionnan expresa den arte di palabra. Nos por a mira e nervionan cu a
sali hunto cu e participantenan su prome palabranan riba e podium. Pero despues di e stap
inicial masha lihe e poetanan nobo a haya nan mes confortabel cu nan bos y palabranan. Tin
participantenan cu ya caba tabata skirbi pa un tempo pero no a tribi nunca di comparti esaki cu
otro persona, ni menos un publico. Sea cu tabata un persuna cu nunca a haya un introduccion
riba arte di palabra, of un persona cu ya sa skirbi poesia, tur e participantenan a haya guia di sra.
Henriquez pa structura nan pensamento y sintimento.

Mas aleu tur participantenan a haya guia di sra. Henriquez riba con pa structura un poema,
hayando asina tambe introduccion riba e diferente tipo di skemanan di rimamento. Estilonan
di rond henter mundo tambe a wordo discuti manera poesia free verse (Ingles) , Haiku
(Hapones) y Gushi (Chines).
Pero cada biaha tabata uza estilo di paisnan di afo, semper a centra esaki bek na e participante
y unda nan ta biba: Aruba. Esaki a wordo refleha tambe di e manera con e showcase a
wordo organisa. Poetanan y te hasta musico local a wordo invita pa sra. Henriquez pa asina
e participantenan di e workshop haya un bista riba poetanan cu ya caba tin un tempo ta
presentando dilanti audiencia.

Nos a tuma nota di diferente poetanan cu cada luna ta deleita un publico cu nan arte di palabra
na e Poetry Night organisa pa Basha Foundation. Por a presencia e poesia di Henry Dabian,
kende frecuentemente ta skirbi y presenta poemanan relaciona cu amor, pero ta declama te
hasta poesia cu ta trata historia, manera su poema cu ta papia di e situacion di Venezuela
actual. Sr. Dabian a declama tambe un poesia cu tabata expresa su emocionnan en relacion cu
Rishandroh y Eugene kende a wordo dera ayera. Pearl Dumfries a toca e prome cantica cu el
a skirbi pa asina honra e poetanan nobo. Cu su bos por a mira cu audiencia a calma ora nan a
tende esaki.

Charles Croes, kende ta conoci pa su actuacion intenso y compleho durante e anochinan di
poesia, tabata un di e prome cu a presenta y tambe a cera e anochi cu un poema cual a envolvi
publico presente den dje. Poeta Luis Villegas, kende ta conoci den e ‘poetry scene’ tanto como
un persona cu sa uza e 4 lenguahenan cu nos ta papia riba nos isla den su arte como un poeta
cu gusta declama riba dak di edificio, a declama for di su buki di poesia. E poemanan a conta
metaforicamente sr. Villegas su lucha contra burocracia pa asina haya un manera pa obtene
nacionalidad Hulandes. (Luis tambe ta un di nos redactornan, red.)

Leonardo Philips a mustra e publico su arte di palabra den su estilo similar na e genero rap,
pero cu sr. Philips su mesun ‘twist’ den dje. Particularmente sr. Philips su mensahe ta uno di
positivismo y di podera bo mes. Na final sr. Philips a subraya cu e ta spera cu e poetanan nobo
cu a haya les for di sra. Henriquez lo tuma parti tambe di e Poetry Night den futuro. ‘Nos no
por tin un anochi di poesia sin poetanan’, ta loke e poeta a finalisa cu ne.
Riba e punto aki sr. Croes a elabora, bisando cu: “E ta un anochi cu a bin ta existi djis paso dos
persona no tabatin nada di haci. Despues cu a tene e prome Poetry Night na Cuba’s Cooking
par di tempo a pasa y el a muri. Desde cu Maria Silva a piki e concepto aki bek el a haya bida
atrobe. Pero mas poetanan kiermen tin mas idea y emocionnan cu ta wordo intercambia.”

Kinan el a señala riba e manera diferente con sr. Villegas ta presenta su arte. E poeta aki di su
parti a expresa cu e importancia di poesia su atributo di sanacion emocional ta particularmente
importante den nos sociedad actualmente. “Mirando tambe cu hopi di boso tanto poeta nobo
como experiencia a declama tocante Rishandroh y Roshandrick.”

Sr. Croes a cera e anochi cu un poema interactivo unda el a pidi pa publico presente bisa ‘two’
ora e mustra mustra un dede y ‘children’ ora e mustra otro dede. E poeta tabata ripiti esaki y
entre e ripiticionnan di publico el a trece un mensahe dilanti pa no lubida e suceso.